Atalǵan turaqtandyrý qory búginde halyqqa qajetti barlyq taýarlardy taıaýda ǵana paıdalanýǵa berilgen Shymkent qalasyndaǵy kólik-logıstıkalyq ortalyǵynda saqtaýǵa kirisken bolatyn. Qazir atalǵan qor mundaǵy 4 myń sharshy metrlik qoımalardy jalǵa alyp, 2,5 myń tonnaǵa jýyq azyq-túlik taýarlaryn saqtap otyr. Atalǵan seriktestiktiń jumysymen tanysqan óńir basshysy baǵany turaqtandyrýda zamanaýı qoımalardyń mańyzdy ekenin jetkizdi.
– Elimizdiń soltústik aımaqtarynda qystyń kesh túsip, jyly temperatýranyń saqtalýyna baılanysty taýar óndirýshilerdiń qoımalardaǵy kartop, sábiz ónimderi shirip ketip jatyr. Sonyń saldarynan taýar óndirýshiler qoımalardaǵy taýarlaryn jappaı satýǵa shyǵarýda. Bul jáıt aldaǵy kóktem aılarynda naryqta keıbir ónim túrleriniń tapshylyǵyna alyp kelýi múmkin. Sondyqtan oblysymyzda qurylǵan turaqtandyrý qory Shymkent qalasynda ornalasqan kólik-logıstıkalyq ortalyǵyndaǵy jańa zamanaýı qoımany paıdalanýdy qolǵa aldy. Qordyń bul áreketin quptarlyq dep baǵalaımyn, – dedi Janseıit Qanseıituly.
Óńir basshysy qordyń jalǵa alyp otyrǵan qoımalaryn aralap kórip, et pen et ónimderin de saqtaýǵa keńes berdi.
– Buǵan deıin turaqtandyrý qory taýarlaryn Keńes zamanynan qalǵan qoımalarda saqtap keldi. Talapqa saı kelmegendikten saqtalǵan taýarlar erte búlinip, birqatar shyǵyndarǵa uranatyn. Endi mine Shymkent qalasynan zamanaýı qoıma paıdalanýǵa berilip, taýarlarymyzdy saqtaý merzimi uzaryp otyr. Qazirdiń ózinde biz osynda saqtalǵan kartoptardy 85 teńgeden, sábizdi 80 teńgeden, al pıazdy 50 teńgeden satylymǵa shyǵarýdamyz, – dedi «Shymkent» áleýmettik kásipkerlik korporasıasy tóraǵasynyń orynbasary Maratbek Myrzamuratov.
Aıta keteıik, mundaǵy barlyq taýarlar bırja arqyly satyp alynady. Ekijaqty jasalǵan shart boıynsha satýshylar taýarlaryn ózinde saqtap, keıinnen suranysqa saı osy qoımaǵa jetkizip berip otyrady. Al áleýmettik mańyzy bar bul azyq-túlik qory baǵa sharyqtap ketken jaǵdaıda básekelestik orta qalyptastyryp, ony qaıta qalypqa keltirýge sep bolmaq. Atqarylǵan jumystardyń nátıjesinde qarasha aıyna belgilengen 101 paıyz baǵa ındeksi 98,5 paıyzǵa tómendep otyr.
OQO ákimniń baspasóz qyzmeti
