«TURAN» arnaiy ekonomikalyq aimaǵynda birqatar ónerkásip oryndary óz jumysyn bastady. Túrkistandy indýstriialyq jáne investitsiialyq ortalyq retinde damytýǵa arnalǵan erekshe alańnyń investitsiialyq portfelinde qazirgi tańda 550 mlrd teńgeni quraityn 137 joba bar. Olar elimizdiń óndiristik áleýetin arttyryp, aimaqtyq ekonomikany ártaraptandyrýǵa yqpal etedi. Dál osyndai mańyzdy jobalardyń birqatary BAQ ókilderine uiymdastyrylǵan press-týr aiasynda tanystyryldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Eń aldymen jýrnalister «PSI Mineral Technologies» JShS – taý-ken-metallýrgiia keshenine arnalǵan aýyr jabdyqtar óndiretin zaýytqa bardy. Bul joba jalpy 8,33 mlrd teńge kóleminde investitsiia tartqan. Joba tolyq iske qosylǵanda 200 adam jumyspen qamtylady dep kútilýde.
Qazirdiń ózinde zaýyt qurylysyna 95% jergilikti turǵyndar, iaǵni Túrkistan oblysynyń turǵyndary tartylǵan. Zaýyt ǵimaratynan ózge, munda ashana men 120 jatyn orny bar jumysshylarǵa arnalǵan jataqhana salynýda.
Baspasóz týry barysynda jýrnalister «Altyn dala maqta» JShS – PVH qubyrlaryn óndirý zaýytymen tanysty. 6,7 mlrd teńge somasynda iske asyrylyp jatqan bul jobanyń bolashaqtaǵy óndiristik qýaty joǵary. Búginde zaýyt tamshylatyp sýarýǵa arnalǵan qubyrlardy shyǵarýda.
Press-týr aiasynda tilshiler qaýymy «Túrkistan maqta-agroónerkásiptik kesheni» JShS – maqta klasterin qurý boiynsha iri jobany aralap kórdi. Keler jyly júzege asatyn jobanyń quny 146,8 mlrd teńgeni quraidy. Tolyq tsikldi toqyma fabrikasynyń quramynda jip iiretin, mata shyǵaratyn, boiap, óńdeitin 11 tseh salynady. 2000-nan asa jańa jumys orny ashylady. Jospar boiynsha jylyna 13000 tonna iirilgen jip, úige arnalǵan 50 million metr toqyma buiymdaryn, 7 million tósek-oryn jiyntyǵyn shyǵarady. Óndiris ornynyń qýattylyǵy jyl saiyn artyp otyrady.
Maqta-toqyma klasterin damytýǵa baǵyttalǵan óndiris ornynyń qurylysyn Xinjiang Lihua Group Co., LTD kompaniiasy qolǵa aldy. Kompaniia álemge tanymal «Louis Vuitton», «Gucci» brendterimen tikelei jumys isteidi. Aldaǵy ýaqytta Túrkistanda shyǵaratyn jipter men matalardy áigili brendterge satýdy kózdep otyr.
«TURAN» AEA aiasynda júzege asyrylyp jatqan jobalar aimaqtaǵy jumyssyzdyq deńgeiin tómendetip, óńirdiń óndiristik áleýetin arttyrýda mańyzdy ról atqarady. Bul jobalar el ekonomikasyn ártaraptandyrý jáne investitsiia tartý baǵytyndaǵy tiimdi qadam bolyp esepteledi.
Jalpy «TURAN» arnaiy ekonomikalyq aimaǵy 2018 jyly Qazaqstan Respýblikasy Úkimetiniń №693 Qaýlysyna sáikes qurylǵan. Aimaqtyń negizgi missiiasy – Túrkistan qalasynyń ekonomikalyq jáne investitsiialyq áleýetin arttyrý, ony Túrki áleminiń rýhani jáne iskerlik ortalyǵyna ainaldyrý. «TURAN» AEA jalpy aýmaǵy 3987 gektardy quraidy jáne 6 negizgi, qosalqy aimaqtan turady.
