– Biz segiz ret skoroi shaqyrdyq bir aidyń ishinde noiabrde. Osynyń bárine shydap kele jatty ol kisi. Túnde saǵat úshte qatty qinaldy. Skoroi shaqyrtqan joq, «Dariia, shaqyrmashy, barǵym kelmeidi, erteń sot, sotqa baramyn» degen áńgime boldy. Biraq túske qarai shydai almady, skoroi shaqyrdyq, – dedi Dariia Júsip.
Alty aidan beri azapty kúnder ótýde degen akterdyń jary Dariia Júsip tilshilermen tuńǵysh tildesti. 17 sáýirdegi sot otyrysynan keiin ózin jaisyz sezingen Tuńǵyshbai Jamaqulovtyń júregi syr bergen. Oǵan jelilerde jazylǵan jalǵan aqparat ta sebep bolǵan eken. Al Halyq artisiniń tolyq aqtalyp shyǵýyna dálel az deidi qorǵaýshylar.
– Qazirgi tańda sot sheshimi shyǵady, sot sheshimi bárin anyqtaidy. Biraq dál qazir jetkilikti dáleldemeler óte az is boiynsha, – dedi qorǵaýshy Baqytkúl Qadyrbekova.
Jamanqulovtyń qorǵaýshylary jalǵan derek taratqan aqparat quraldaryn zań aldynda jaýapqa tartýǵa nietti. Al aiyptaý aktisi boiynsha Tuńǵyshbai Jamanqulov qylmystyq áreketti birneshe adammen birigip júzege asyrdy delingen. Film túsirilimine bólingen 79 million teńgeniń 69 milliony qoldy bolypty. Bul is boiynsha jalpy sany 9 adam jaýapqa tartylǵan. Al tózimdi bolýdy úirendim degen Halyq artisiniń jary onyń kinásizdigine senimdi.
– Tazalyqpen, shyndyqpen qaraityn bolsa, Tuńǵyshbai Qadyrovichtiń esh aiyby joq. Ony búkil halyq biledi, qasyndaǵy adamdar, joǵarydaǵy adamdar. Biraq nege mán bermei otyrǵany maǵan úlken qupiia, – dedi T.Jamanqulovtyń jary Dariia Júsip.
Akterdiń aýyryp qalýyna bailanysty kelesi sot otyrysy 27 sáýirge belgilengen. Qazir halyq ártisi Tuńǵyshbai Jamanqulov qalalyq kardiologiialyq ortalyqta em qabyldaýda.
