Qostanai qalasynyń №2 soty túngi klýbta bolǵan tóbeleske qatysty qylmystyq isti qarady, dep habarlaidy Dala News.
Sot materialdaryna sáikes, aiyptalýshylar Al., S. jáne Ai. buzaqylyq nietpen adam densaýlyǵyna qasaqana aýyr ziian keltirý jáne top bolyp jasalǵan buzaqylyq boiynsha jaýapqa tartylǵan.
Is barysynda 2025 jyldyń maýsym aiynda aiyptalýshylar túngi klýbta alkogol iship otyrǵany anyqtaldy. Bi alańynda Al. jábirlenýshimen soqtyǵysyp qalǵannan keiin, bolmashy sebepti syltaý etip, ony judyryqpen uryp jibergen. Soqqydan jábirlenýshi jerge qulap, keiin sol kóziniń kórý qabiletin joǵalta bastaǵan. Saldarynan oǵan aýyr dene jaraqaty keltirilgen.
Odan keiin aiyptalýshylar syrtqa shyǵyp, toptasyp taǵy birneshe adamǵa qol jáne aiaqpen soqqy jasaǵan. Nátijesinde birqatar jábirlenýshi jeńil jaraqat alǵan.
Sotta aiyptalýshylardyń ekeýi kinásin ishinara moiyndasa, bireýi tolyq moiyndaǵan. Jábirlenýshiler qatań jaza taǵaiyndaýdy surady.
Sot úkim shyǵarý kezinde aiyptalýshylardyń kináni moiyndaýy men ókinýin jeńildetetin mán-jai retinde eskergen. Al qylmystyń alkogoldik mas kúide jasalýy aýyrlatatyn jaǵdai dep tanylǵan.
Nátijesinde sot:
- Al. 7 jylǵa;
- S. jáne Ai. 3 jyldan bas bostandyǵynan aiyrý jazasyna kesildi.
Jaza ortasha qaýipsizdik mekemesinde óteledi.
Sonymen qatar jábirlenýshilerdiń azamattyq talaptary qanaǵattandyryldy.
Úkim zańdy kúshine áli engen joq.
