قوستاناي قالاسىنىڭ №2 سوتى تۇنگى كلۋبتا بولعان توبەلەسكە قاتىستى قىلمىستىق ءىستى قارادى، دەپ حابارلايدى Dala News.
سوت ماتەريالدارىنا سايكەس، ايىپتالۋشىلار ال.، س. جانە اي. بۇزاقىلىق نيەتپەن ادام دەنساۋلىعىنا قاساقانا اۋىر زيان كەلتىرۋ جانە توپ بولىپ جاسالعان بۇزاقىلىق بويىنشا جاۋاپقا تارتىلعان.
ءىس بارىسىندا 2025 جىلدىڭ ماۋسىم ايىندا ايىپتالۋشىلار تۇنگى كلۋبتا الكوگول ءىشىپ وتىرعانى انىقتالدى. بي الاڭىندا ال. جابىرلەنۋشىمەن سوقتىعىسىپ قالعاننان كەيىن، بولماشى سەبەپتى سىلتاۋ ەتىپ، ونى جۇدىرىقپەن ۇرىپ جىبەرگەن. سوققىدان جابىرلەنۋشى جەرگە قۇلاپ، كەيىن سول كوزىنىڭ كورۋ قابىلەتىن جوعالتا باستاعان. سالدارىنان وعان اۋىر دەنە جاراقاتى كەلتىرىلگەن.
ودان كەيىن ايىپتالۋشىلار سىرتقا شىعىپ، توپتاسىپ تاعى بىرنەشە ادامعا قول جانە اياقپەن سوققى جاساعان. ناتيجەسىندە ءبىرقاتار جابىرلەنۋشى جەڭىل جاراقات العان.
سوتتا ايىپتالۋشىلاردىڭ ەكەۋى كىناسىن ءىشىنارا مويىنداسا، بىرەۋى تولىق مويىنداعان. جابىرلەنۋشىلەر قاتاڭ جازا تاعايىنداۋدى سۇرادى.
سوت ۇكىم شىعارۋ كەزىندە ايىپتالۋشىلاردىڭ كىنانى مويىنداۋى مەن وكىنۋىن جەڭىلدەتەتىن ءمان-جاي رەتىندە ەسكەرگەن. ال قىلمىستىڭ الكوگولدىك ماس كۇيدە جاسالۋى اۋىرلاتاتىن جاعداي دەپ تانىلعان.
ناتيجەسىندە سوت:
- ال. 7 جىلعا؛
- س. جانە اي. 3 جىلدان باس بوستاندىعىنان ايىرۋ جازاسىنا كەسىلدى.
جازا ورتاشا قاۋىپسىزدىك مەكەمەسىندە وتەلەدى.
سونىمەن قاتار جابىرلەنۋشىلەردىڭ ازاماتتىق تالاپتارى قاناعاتتاندىرىلدى.
ۇكىم زاڭدى كۇشىنە ءالى ەنگەن جوق.
