Túlkibas aýdanyna qarasty Aqbiik aýyldyq okrýginde Shymkent qalasynan alynǵan forel balyǵynyń 50 myń dana shabaǵy jasandy toǵanǵa jiberildi,- dep habarlaidy Dalanews.kz
Túrkistan oblysy ákimi Nuralhan Kósherovtiń tapsyrmasyna sáikes, balyq sharýashylyǵyn damytý júieli jolǵa qoiylyp, tiisti jumystardyń nátijesinde jergilikti kásipkerler tarapynan atalǵan kásipti damytýǵa qyzyǵýshylyq artyp keledi.
Túlkibas aýdanyna qarasty Aqbiik aýyldyq okrýgindegi Tólepbergen Baýyrjan esimdi azamat osydan 1 jyl buryn óz jerine 6 jasandy toǵan daiyndap, oǵan 30 myń dana forel balyǵynyń shabaqtaryn jibergen bolatyn. Búgingi tańda sol jibergen shabaqtarynan 7 tonna ónim alyp, jol boiyndaǵy dúngirshekte jáne kól basynda satyp, kásibiniń jemisin kórip jatyr.
Búgin atalǵan sharýashylyqqa aýdan basshysy Asqar Estibaev arnaiy baryp, jumysymen tanysyp, kólge balyq shabaqtaryn jiberý jumystaryn baqylady. Ol jerde Shymkent qalasynan alynǵan forel balyǵynyń 50 myń dana shabaǵy jasandy toǵanǵa jiberildi.
Kásipker aýdan ákimine munymen toqtap qalmai aldaǵy ýaqytta jol boiyna balyq taǵamdaryn jolaýshylarǵa usynatyn ashana salýdy josparlap otyrǵanyn atap ótti.
Aýdan basshysy jas kásipkerdiń isine sáttilik tilep, balyq sharýashylyǵyn damytý baǵytyndaǵy josparyn qoldaityndyǵyn jetkizdi. Sonymen qosa Asqar Sultanuly Kereit eldi mekenindegi balyqtyń forel jáne bekire túrlerin ósirýmen ainalysatyn «GRAND FISH COMPANY» JShS-ne arnaiy baryp, jumysymen tanysty.
Búginde atalǵan seriktestik Shymkent qalasyndaǵy meiramhanalarǵa óz ónimin ótkizip keledi. Jalpy seriktestikte balyq sharýashylyǵanan bólek demalys aimaǵy bar. Ol jerde 30 adamǵa shaqtalǵan qonaqúi men 1 myń adam siiatyn jazǵy demalys basseiini halyqqa qyzmet etedi. 2012 jyly jumysyn bastaǵan nysanda qazirgi tańda 9 adam turaqty jumyspen qamtylǵan.
