Túlekter bir otbasyna úi, mektepke avtobýs syilady
Túrkistan oblysynda «Rýhani jańǵyrý» baǵdarlamasy aiasynda «Altyn uiam» jobasy qolǵa alynǵan bolatyn. Maqsaty – túlekterdiń mektep bitirgenderine jiyrma, otyz jyl tolýyna orai ótetin basqosýlaryn tek toi toilaýmen shektemei, týǵan jerge igi is jasaýǵa jumyldyrý. Byltyrdan beri osy baǵytta jumys júrgizilip, túlekter qaiyrymdy iske belsene atsalysyp keledi. Sonyń dálelindei, jýyrda ǵana Túrkistan oblysy, Shardara aýdanynda túlekter kópbalaly otbasyǵa úi alyp berdi.
Naqtyraq aitsaq, Shardara aýdany, Qosseiit aýylyndaǵy «Syrdariia» jalpy orta mektebiniń 1999 jylǵy túlekteri 20 jyldyqqa orai Volotkinder otbasyna baspana tartý etti. Úili bolyp, qýanyshqa kenelgen Andrei jáne Anastasiia Volokitinderdiń 9 perzenti bar. Otaǵasy Andrei turmystyq tehnikalardy jóndeýmen, al áieli Anastasiia men balalary sharýa qojalyqtarynda jaldanyp jumys isteidi. Turaqty jumys bolmaǵandyqtan páter jaldap, qinalyp júrgen otbasynyń jaǵdaiyn túsingen azamattar Volotkinderge jer alyp, ádemi úi salyp berdi. Sonymen birge aýyl ákimdigimen birlesip, elektr jaryǵy men aýyz sýmen de qamtamasyz etti.
Ózderi bilim alǵan mektepke interaktivti taqta, proektor jáne kompiýter syiǵa tartqan synyptastar munymen shektelmei, áleýmettik qoldaýdy qajet etetin otbasyny da qýanyshqa keneltip otyr. Aýyl ákimdigimen, mektep basshylyǵymen, synyptastarmen aqyldasqan túlekter ózderimen birge oqyǵan Anastasiiany qoldai bildi. Kópbalaly áýlettiń qýanyshyna arnaiy kelip, aýyl turǵyndaryna as berdi. Ómirden ótkenderdiń rýhyna quran baǵyshtady. Úili bolǵan otbasyǵa gaz plitasy men kilem syilap, kóńilderin odan saiyn kóterdi. Bul saýapty basqosýǵa Shardara aýdany ákiminiń orynbasary Baýyrjan Shompiev qatysyp, qaiyrymdy azamattardy aýdan ákiminiń alǵys hatymen marapattady. Al úi ielerine kórimdikke kilem syilady.
«Altyn uiam» jobasy aiasyndaǵy igi ister Túrkistan oblysy, Sozaq aýdanynda da jalǵasty. Aýdandaǵy Sh.Ýálihanov atyndaǵy mekteptiń 1999 jylǵy túlekteri ózderi bilim alǵan altyn uialaryna "GAZel" shaǵyn avtobýsyn alyp berdi. Jaqynda saltanatty túrde tapsyrmaq. Mektep ujymy men ustazdaryn qýanyshqa bólegen synyptastar týǵan jerdi qurmetteýdiń úlgisin kórsete bildi.
Túrkistan oblysy ákiminiń baspasóz qyzmeti
