Depýtat Baqytjan Bazarbek jerleri jekemenshikke ótip ketken ýniversitetterge qatysty másele kóterdi, dep habarlaidy Dalanews.kz Ulysmedia.kz-ke siltep.
Bazarbek saýalyn oqý-aǵartý jáne joǵarǵy bilim jáne ǵylym ministrligine joldady.
- Jer kodeksiniń 26 jáne 39-babyn qatań túrde buzyp, ákimder bilim berý mekemeleriniń jerlerin zańsyz jekemenshikke berip tastaǵan. QazUÝ jerin “Jer amanaty” komissiiasymen túgeldep jinai almai otyrmyz. Aqtóbe memlekettik ýniversiteti, QyzPÝ-dyń 9 gektar jeri ketip qalǵan. Sonymen qatar, Agrarlyq ýniversitettiń jerleri jekemenshikke ótip ketken. Osyǵan orai, zań jobasynyń ishinde jer kodeksiniń 26-babyna tiisti bilim berý mekemeleriniń jerlerin bólý, nysanaly maqsatyn ózgertýge tyiym salý jáne ony rezervke qoiý siiaqty normalardy bizdiń depýtattyq top usynys jasady. Biraq úkimet tarapynan teris qorytyndy shyqqan. Osyǵan orai suraǵym: halyq úshin mańyzdy usynysqa úkimet qalaisha teris qorytyndy bergen, onyń artynda ne jatyr?, deidi depýtat Bazarbek.
Oqý-aǵartý vitse-ministri Edil Ospan zań jobasynda qarastyrylǵan normaǵa qatysty ministrlik qoldaitynyn aitty.
- Bul jerde mektepke deiingi bilim berý mekemelerin damytý túrli baǵdarlamanyń negizinde jeke mektepterdi damytýǵa baǵyttalsa, qazirgi tańda jappai eldimekenderde arnaiy mekemelerdi salý máselesi ózekti bolyp otyr. Osy baǵytta mektepke deiingi uiymdarǵa jerlerdiń arnaiy bólinýin basqa maqsatta jumsalmaýyn qoldaimyz, deidi Edil Ospan.
Bul máselege qatysty ǵylym jáne joǵary bilim vitse-ministri Talǵat Eshenqulov ta pikir bildirdi.
- Ǵylym jáne joǵary bilim ministrligine qarasty joǵarǵy oqý oryndarynyń barlyǵy kommertsiialyq emes aktsionerlik qoǵam formasyna kóshirilgen. Sondyqtan solardyń múlikteri, sonyń ishinde, jerleri aktsionerlik qoǵamdardyń menshigi bolyp esepteledi. Sondyqtan bul normany qaraýǵa qatyspaǵan edik. Biraq sizdermen jeke talqylaýǵa daiynbyz, deidi Eshenqulov.
