دەپۋتات باقىتجان بازاربەك جەرلەرى جەكەمەنشىككە ءوتىپ كەتكەن ۋنيۆەرسيتەتتەرگە قاتىستى ماسەلە كوتەردى، دەپ حابارلايدى Dalanews.kz Ulysmedia.kz-كە سىلتەپ.
بازاربەك ساۋالىن وقۋ-اعارتۋ جانە جوعارعى ءبىلىم جانە عىلىم مينيسترلىگىنە جولدادى.
- جەر كودەكسىنىڭ 26 جانە 39-بابىن قاتاڭ تۇردە بۇزىپ، اكىمدەر ءبىلىم بەرۋ مەكەمەلەرىنىڭ جەرلەرىن زاڭسىز جەكەمەنشىككە بەرىپ تاستاعان. قازۇۋ جەرىن “جەر اماناتى” كوميسسياسىمەن تۇگەلدەپ جيناي الماي وتىرمىز. اقتوبە مەملەكەتتىك ۋنيۆەرسيتەتى، قىزپۋ-دىڭ 9 گەكتار جەرى كەتىپ قالعان. سونىمەن قاتار، اگرارلىق ۋنيۆەرسيتەتتىڭ جەرلەرى جەكەمەنشىككە ءوتىپ كەتكەن. وسىعان وراي، زاڭ جوباسىنىڭ ىشىندە جەر كودەكسىنىڭ 26-بابىنا ءتيىستى ءبىلىم بەرۋ مەكەمەلەرىنىڭ جەرلەرىن ءبولۋ، نىسانالى ماقساتىن وزگەرتۋگە تىيىم سالۋ جانە ونى رەزەرۆكە قويۋ سياقتى نورمالاردى ءبىزدىڭ دەپۋتاتتىق توپ ۇسىنىس جاسادى. ءبىراق ۇكىمەت تاراپىنان تەرىس قورىتىندى شىققان. وسىعان وراي سۇراعىم: حالىق ءۇشىن ماڭىزدى ۇسىنىسقا ۇكىمەت قالايشا تەرىس قورىتىندى بەرگەن، ونىڭ ارتىندا نە جاتىر؟، دەيدى دەپۋتات بازاربەك.
وقۋ-اعارتۋ ۆيسە-مينيسترى ەدىل وسپان زاڭ جوباسىندا قاراستىرىلعان نورماعا قاتىستى مينيسترلىك قولدايتىنىن ايتتى.
- بۇل جەردە مەكتەپكە دەيىنگى ءبىلىم بەرۋ مەكەمەلەرىن دامىتۋ ءتۇرلى باعدارلامانىڭ نەگىزىندە جەكە مەكتەپتەردى دامىتۋعا باعىتتالسا، قازىرگى تاڭدا جاپپاي ەلدىمەكەندەردە ارنايى مەكەمەلەردى سالۋ ماسەلەسى وزەكتى بولىپ وتىر. وسى باعىتتا مەكتەپكە دەيىنگى ۇيىمدارعا جەرلەردىڭ ارنايى ءبولىنۋىن باسقا ماقساتتا جۇمسالماۋىن قولدايمىز، دەيدى ەدىل وسپان.
بۇل ماسەلەگە قاتىستى عىلىم جانە جوعارى ءبىلىم ۆيسە-مينيسترى تالعات ەشەنقۇلوۆ تا پىكىر ءبىلدىردى.
- عىلىم جانە جوعارى ءبىلىم مينيسترلىگىنە قاراستى جوعارعى وقۋ ورىندارىنىڭ بارلىعى كوممەرسيالىق ەمەس اكسيونەرلىك قوعام فورماسىنا كوشىرىلگەن. سوندىقتان سولاردىڭ مۇلىكتەرى، سونىڭ ىشىندە، جەرلەرى اكسيونەرلىك قوعامداردىڭ مەنشىگى بولىپ ەسەپتەلەدى. سوندىقتان بۇل نورمانى قاراۋعا قاتىسپاعان ەدىك. ءبىراق سىزدەرمەن جەكە تالقىلاۋعا دايىنبىز، دەيدى ەشەنقۇلوۆ.
