Qazaqstan AQSh tarapymen qosymsha tarifter engizý máselesine bailanysty kelissózdi jalǵastyryp jatyr, dep habarlaidy Dalanews.kz.
"Osy úderis aiasynda biyl maýsymda QR Saýda jáne integratsiia ministrliginiń ókilderi AQSh tarapymen ekijaqty kezdesý ótkizdi. Qazaqstan AQSh-qa ózara tiimdi saýda yntymaqtastyǵyn damytý, taýar jetkizý tizbekterin turaqty saqtaý jáne naryqqa ádil qol jetkizý sharttaryn qamtamasyz etý máselelerin qamtityn resmi usynys joldady. Bul usynys AQSh Prezidenti D.Tramptyń 2025 jylǵy 2 sáýirdegi jarlyǵy men oǵan engizilgen keiingi ózgeristerdi eskere otyryp ázirlengen", - dep jazylǵan habarlamada.
Kelissózder barysynda taraptar usynylǵan bastamalardy jan-jaqty qarastyrǵan.
"Qazaqstan tarapy syndarly yntymaqtastyqqa beiil ekenin rastaidy. Qarsy tarap ta kelissózderdi jalǵastyrýǵa ashyq. Bul óz kezeginde ózara tiimdi ári eki eldiń múddelerine sai keletin sheshimderdi ázirleýge múmkindik beredi", - dep jazylǵan habarlamada.
Saýda ministrligi aqparatyna súiensek, engizilgen tarif AQSh-qa Qazaqstannan jetkiziletin jalpy eksport kóleminiń nebári 4,8%-yna áser etedi, al qalǵan 95,2%-y jańa kedendik bajdan tys qalady. Qazir Qazaqstan AQSh-qa munai, ýran, kúmis, ferroqorytpalar, tantal, titan, berillii jáne ózge de ónim túrlerin eksporttaidy. Bul ónimderdiń basym bóligi tarifsiz, shekteýsiz eksporttalyp jatyr.
"Jańa tarifterdiń yqpaly sary fosfor, ferrosilitsii, linzalar, bidai gliýteni jáne ammonii nitraty syndy taýarlarǵa tiedi", - dep jazylǵan habarlamada.
Keshe AQSh prezidenti Donald Tramp on shaqty elge, sonyń ishinde Qazaqstanǵa qatysty baj salyǵyn engizý týraly jarlyqqa qol qoidy.
