AQSh prezidenti Donald Tramp Resei prezidenti Vladimir Pýtinmen telefon arqyly sóilesip, Ýkrainadaǵy soǵysty toqtatý jóninde «shuǵyl kelissózderdi bastaýǵa» ýaǵdalasty, dep habarlaidy Dalanews.kz.
Tramptyń aitýynsha, olar tek Ýkraina máselesin ǵana emes, sondai-aq Taiaý Shyǵystaǵy jaǵdaidy, energetika máselelerin, jasandy intellektti, dollardyń rólin jáne basqa da taqyryptardy talqylady.
«Biraq eń bastysy – ekeýmiz de keliskendei, Resei men Ýkraina arasyndaǵy soǵysta milliondaǵan adamnyń qaza tabýyn toqtatqymyz keledi», – dep jazdy Tramp óziniń Truth Social jelisindegi paraqshasynda.
BBC Russian derekkóziniń málimetinshe, ol Pýtinmen kelissóz júrgizip, Resei men AQSh ókilderi soǵysty aiaqtaý boiynsha shuǵyl kelissózderdi bastaitynyn málimdedi.
Kremldiń baspasóz hatshysy Dmitrii Peskovtyń aitýynsha, eki kóshbasshynyń áńgimesi «bir jarym saǵatqa jýyq» sozylǵan. Kremldiń habarlaýynsha, qos eldiń basshylary jeke kezdesý uiymdastyrýǵa ýaǵdalasqan.
Sonymen qatar Peskovtyń málimdeýinshe, Pýtin Ýkrainamen yqtimal beibitshilik týraly sóz qozǵaǵan kezde «qaqtyǵystyń túpki sebepterin joiý qajettigin» atap ótken. Sondai-aq ol Tramppen uzaqmerzimdi retteý tek beibit kelissózder arqyly múmkin ekenin moiyndaǵan. Resei bul másele boiynsha kelissóz júrgizýge AQSh-tyń resmi ókilderin qabyldaýǵa daiyn ekenin bildirdi.
AQSh tarapynan kelissózderdi memlekettik hatshy Marko Rýbio, Ortalyq barlaý basqarmasynyń direktory Djon Retkliff, ulttyq qaýipsizdik jónindegi keńesshi Maikl Ýoltts jáne arnaiy ókil Stiv Ýitkoff júrgizedi.
Keiin jýrnalisterdiń suraqtaryna jaýap bergen Tramp alǵashqy kezdesý Pýtinmen Saýd Arabiiasynda ótetinin aitty.
Pýtinmen áńgimeden keiin Tramp Ýkraina prezidenti Vladimir Zelenskiimen de sóilesti. Bul áńgime shamamen bir saǵatqa sozylǵan. Tramptyń aitýynsha, Zelenskii de Pýtin sekildi beibitshilik ornatqysy keledi.
«Biz soǵysqa qatysty kóptegen máseleni talqyladyq, biraq negizinen juma kúni Miýnhende ótetin kezdesýdi sóz ettik. Bul kezdesýde AQSh delegatsiiasyn vitse-prezident Djei Di Vens pen memlekettik hatshy Marko Rýbio basqarady. Men bul kelissózderdiń nátijeli bolaryna úmittenemin», – dep jazdy Tramp.
Zelenskii óz Telegram-arnasynda Tramppen áńgime barysynda «beibitshilikke qol jetkizý múmkindikteri» men «komandalar deńgeiinde birlesip jumys isteýge ázirlik» talqylanǵanyn rastady. Ol Ýkraina «beibitshilikti bárinen de qatty qalaitynyn» atap ótti.
Sondyqtan Kiev qazirgi ýaqytta «Amerikalyq áriptesterimen birlesip, Resei agressiiasyn toqtatý jáne senimdi ári uzaqmerzimdi beibitshilikti qamtamasyz etý joldaryn aiqyndap» jatqanyn jetkizdi.
Alaida ázirge Tramp ta, Zelenskii de qandai da bir naqty beibit kelisim sharttary nemese aldyn ala ýaǵdalastyqtar jóninde aqparat bergen joq.
