AQSH memlekettik ákimshiliginiń saıtynda jarıalanǵan málimetke sáıkes, Aq úı Djýlı Stafftty Qazaqstandaǵy elshi qyzmetine taǵaıyndaýdy josparlap otyr. Onyń kandıdatýrasyn endi Senat bekitýi tıis, dep habarlaıdy Dalanews.kz.

Djýlı Stafft Ogaıo shtatynda dúnıege kelgen. Ol jeke zertteý ýnıversıteti sanalatyn Case Western Reserve pen Duke University-di támamdaǵan.

Buǵan deıin Moldova men Djıbýtıdegi AQSH elshilikterinde mısıa basshysynyń orynbasary, Ulttyq qaýipsizdik keńesinde, sondaı-aq Polsha, Reseı men Efıopıadaǵy dıplomatıalyq ókildikterde, Memlekettik departamenttiń jedel ortalyǵy men konsýldyq qyzmetter búrosynda jumys istegen.

Afsa.org saıtynda kórsetilgendeı, Ulttyq qaýipsizdik keńesinde ol prezıdent Donald Tramptyń arnaıy kómekshisi ári shekara men kólik qaýipsizdigi jónindegi aǵa dırektor bolǵan.

Bul laýazymǵa taǵaıyndalǵan alǵashqy Memlekettik departament ókili – Stafft edi.

Aıta keteıik, AQSH-tyń Qazaqstandaǵy elshisi qyzmetin 2024 jyldyń qańtaryna deıin Denıel Rozenblúm atqarǵan. Ol ketkennen keıin dıplomatıalyq ókildikti ýaqytsha senimdi ókil Debbı Robınson basqardy.