Ýkraina prezidenti Vladimir Zelenskii Donald Tramptyń Reseimen "keibir terriiatoriialarmen almasý" týraly usynysyna qatysty túsinikteme berdi, dep habarlaidy Dalanews.kz.
NBC News-tiń habarlaýynsha, Zelenskii Tramptyń Truth Social jelisindegi Resei prezidenti Vladimir Pýtinmen kópten kútken kezdesýi osy jumada Aliaskada ótetini belgili bolǵan keiin jariialaǵan jazbasyna qatysty pikir bildirgen.
"Ýkraina territoriia máselesin el Konstitýtsiiasyna súiene otyryp, baiaǵyda alǵa tartqan. Eshkim odan tartynbaidy da shegine de almaidy. Ýkraindyqtar óz jerlerin basqynshylarǵa bermeidi", - dep jazdy Zelenskii Telegram-daǵy arnasynda.
Al AQSh prezidenti Donald Tramp keshe Resei Federatsiiasynyń prezidenti Vladimir Pýtinmen aldaǵy kezdesýi túpkilikti emes ekenin aitty.
Sondai-aq:
- Tramp Pýtinge Ýkrainadaǵy qaqtyǵysty toqtatýdy aitatynyn jetkizdi. "Sonymen, men Vladimir Pýtinmen sóilesip, oǵan: "Siz bul soǵysty toqtatýyńyz kerek, ony aiaqtaýyńyz qajet", dep aitamyn", - dedi ol.
- Tramp kelissózder barysynda Resei men Ýkraina arasynda territoriialarmen almasý bolatyndyǵyna senetinin rastady.
- Sondai-aq ol Aliaskada Vladimir Pýtinmen kezdeskennen keiin Ýkraina prezidenti Vladimir Zelenskiimen sóilesetinin málimdedi. Sondai-aq, Tramp Zelenskiidiń kezdesýge qatysýy múmkin ekenin moiyndady.
- Tramp Máskeýmen arada saýda qatynastaryn qalypqa keltirýge múmkindik beretinin atap ótti jáne "Resei Federatsiiasy óte qundy jer resýrstaryna ie" dep sózin tolyqtyra ketti.
- Tramptyń aitýynsha, ol kezdesýdiń alǵashqy minýttarynda-aq Ýkraina boiynsha mámilege kelýge bolatyn-bolmaitynyn túsine alady.
Aita ketsek, Kiev tarapynyń bastamasymen Memleket basshysy Qasym-Jomart Toqaev 2025 jyly 10 tamyzda Ýkraina prezidenti Vladimir Zelenskiimen telefon arqyly sóilesti.
Aqorda baspasóz qyzmetiniń habarlaýynsha, Qasym-Jomart Toqaev qazaq halqynyń ýkrain halqyna, onyń tarihyna, mádenietine jáne tiline erekshe qurmetpen qaraitynyn atap ótti.
Memleket basshysy Qazaqstannyń Ýkrainada halyqaralyq quqyq qaǵidattary negizinde beibitshilik ornaýyna sózsiz múddeli ekenin jetkizdi.
Atap aitqanda, Prezident Astananyń áýel bastan ádildik negizinde beibitshilik formýlasyn birlese izdeýdi jaqtaǵanyn, BUU Jarǵysyn, memleketterdiń egemendigi men aýmaqtyq tutastyǵyna qolsuqpaýshylyq qaǵidatyn saqtaý týraly júieli túrde pikir bildirgenin eske saldy.
Qasym-Jomart Toqaevtyń pikirinshe, qazirgidei óte kúrdeli jaǵdaida Ýkraina memlekettiligin saqtaý men qorǵaýdy qamtamasyz ete otyryp, qaqtyǵysty baiypty túrde sheshý mańyzdy.
Memleket basshysy taraptar "Janjaldan, jaman bolsa da bitim artyq" degen kóneden kele jatqan danalyqqa sai áreket etýge tiis dep sanaidy.
Qazaqstan Prezidenti territoriialyq túitkildiń kúrdeli ekenin túsinetinin aitty. Bul – halyqaralyq qatynastardaǵy eń qiyn másele. Kóbine beibitshilik týraly kelisimge qol jetkizý, tipti bitimge kelý jolynda eńserilýi qiyn kedergige ainalady. Biraq qazirgi eń basty mindet – qaýipsizdigine halyqaralyq kepildik berý arqyly Ýkraina eliniń memlekettiligin saqtaý.
Sonymen qatar Qasym-Jomart Toqaev Qazaqstan Ýkrainamen ózara múddege sai keletin túrli salada belsendi yntymaqtastyq qurýǵa nietti ekenin atap ótti.
