Quny 5 million dollar bolatyn AQSh-ta turýǵa ruqsat beretin kartaǵa ótinish qaldyratyn sait iske qosyldy. Ol "Tramp kartasy" dep atalady. Onyń iske qosylǵanyn AQSh prezidenti Donald Tramptyń ózi málimdedi, dep habarlaidy Dalanews.kz.
TrumpCard.gov saityna AQSh-ta turaqty turýǵa ruqsat jáne odan ári azamattyq alǵysy keletin áleýetti top ótinish qaldyra alady. Portalda paidalanýshylarǵa aty-jónin, turǵylyqty jerin jáne elektrondy poshtasyn qaldyrý, sondai-aq ótinishti jeke tulǵa retinde me álde kompaniia atynan berip jatyr ma, sony da kórsetý usynylady.
"Munda tirkelgender tek birinshi kezeńdegiler. Áitpese, myńdaǵan adam habarlasyp, qalai tirkelýge bolatyndyǵyn áli surap-bilip jatyr", dep jazdy AQSh prezidenti áleýmettik jelidegi paraqshasynda.
Vizalar áli qoljetimdi emes, biraq ony alǵysy keletinder ózi týraly aqparatty iske qosylǵan saitta qaldyra alady, dep túsindiredi Fox telearnasy.
Osyǵan uqsas EB-5 baǵdarlamasy AQSh ekonomikasyna 800 myń dollardan bastap investitsiia salýshy sheteldik azamattar úshin burynnan qarastyrylǵan. Alaida, zańsyz immigratsiiaǵa qarsy kúresýshi Donald Tramp ákimshiligi bul baǵdarlama tym kóp bylyq-shylyqqa boi aldyrǵan jáne ony "Tramp kartasymen" aýystyrý kerek dep sanaidy.
"Bai adamdar bul kartany satyp alyp, elimizge kele alady. Olar kóptegen adamdy jumysqa alyp, kóp aqsha jumsaityn, kóp salyq tóleitin bai, tabysty adamdar bolady", — dedi Amerika prezidenti 2025 jyldyń aqpanynda. Onyń aitýynsha, AQSh millionǵa jýyq nemese odan da kóp osyndai kartalardy satýdan paida taba alady.
AQSh saýda ministri Govard Liýtniktiń aitýynsha, "altyn kartalar" AQSh-tyń 36 trln dollardan asatyn federaldy qaryzyn óteýde sep bola alady.
"Eger 200 myń adam karta alsa, bul - trillion dollar. Bul bárin ótep, aqtaidy", - dedi ol.
2025 jyldyń sáýirinde Donald Tramp Air Force One prezidenttik ushaǵynyń bortynda jýrnalisterge óziniń beinesi salynǵan sóz etilgen kartanyń úlgisin kórsetken bolatyn.
