AQSh prezidenti Donald Tramp Iranmen júrgizilip jatqan diplomatiialyq kelissózder nátije bermegen jaǵdaida Vashington Tegeranǵa qarsy aýqymdy áskeri soqqylardy qaita bastaýǵa daiyn ekenin málimdedi, dep habarlaidy dalanews.kz.
Axios basylymyna bergen suhbatynda Tramp AQSh birneshe apta buryn josparlanǵan áskeri operatsiiany ýaqytsha toqtatyp, kelissózderge múmkindik bergenin aitty. Onyń sózinshe, mundai sheshim araǵaiyn elderdiń ótinishi men diplomatiialyq arnalardy saqtap qalý maqsatynda qabyldanǵan.
«Eger kelissózder nátije bermese, óte qýatty áskeri áreketke baramyz», – dedi AQSh prezidenti. Onyń aitýynsha, kelissózderdi ýaqytsha jalǵastyrý týraly sheshimnen «eshteńe utqan da, joǵaltqan da joq».
Basylymnyń málimetinshe, Aq úi Iranmen jańa kelissózder arqyly Ormýz buǵazyndaǵy keme qatynasyn tolyq qalpyna keltirýdi jáne Irannyń iadrolyq baǵdarlamasyna qatysty jańa keshendi kelisimge qol jetkizýdi kózdep otyr. Sonymen qatar Vashington áskeri qysymdy tolyq toqtatpaǵanyn, qajet bolǵan jaǵdaida kúsh qoldanýǵa daiyn ekenin kórsetip otyr.
Bul málimdeme AQSh pen Izraildiń Iranǵa qarsy áskeri is-qimyldaryna ýaqytsha úzilis jariialanǵan kezeńde aityldy. The Wall Street Journal málimetinshe, áskeri operatsiiany ýaqytsha toqtatýǵa AQSh-tyń áýe qorǵanysy zymyrandarynyń qorynyń azaiýy jáne diplomatiialyq jolmen máseleni sheshýge múmkindik berý yqpal etken. Sonymen birge AQSh Ortalyq qolbasshylyǵy Iranǵa qarsy áskeri josparlardy ázir kúide ustap otyr.
Alaida Iran tarapy ázirge Vashingtonmen kelissózderdi qaita bastaý týraly ótinish jasamaǵanyn málimdedi. Iran Syrtqy ister ministrliginiń resmi ókili Ismail Baǵaidiń aitýynsha, AQSh-pen jańa kelissózder jóninde eshqandai bastama kóterilgen joq. Sondai-aq Tegeran Ormýz buǵazyndaǵy jaǵdai ózgermegenin jáne ony baqylaýda ustap otyrǵanyn málimdedi.
Sarapshylardyń pikirinshe, Tramptyń bul málimdemesi AQSh-tyń diplomatiialyq arnalardy ashyq qaldyrǵanymen, Iranǵa áskeri qysym tetikterinen bas tartpaitynyn kórsetedi. Aldaǵy kúnderi Aq úide Izrail premer-ministri Biniamin Netaniahýmen ótetin kezdesý barysynda Iran máselesi negizgi taqyryptardyń biri bolýy múmkin.
