11 qazannan bastap elimizde tabiǵi tótenshe jaǵdailardan zardap shekken shaǵyn jáne orta biznes ókilderiniń múliktik shyǵyndaryn óteýdiń jańa erejeleri qoldanysqa engiziledi. Bul týraly QR Ulttyq ekonomika ministrligi málimdedi, dep habarlaidy Dalanews.kz.
Ministr 26 qyrkúiekte tiisti buiryqqa qol qoiǵan.
Ministrliktiń dereginshe, qujatta óńirlik komissiialardyń jumysy naqty reglamenttelgen. Atap aitqanda, olar zardap shekken kásipkerlerdi esepke alady, ótinishterdi qabyldaidy, tólem somasyn belgileidi jáne tizimder jasaidy. Daýly jaǵdailarda is qosymsha saraptamaǵa jiberiledi.
Komissiialar ǵimarattar, avtokólik, jabdyqtar, qoimadaǵy taýarlar men materialdar shyǵyndaryn, sondai-aq qalpyna keltirý jumystaryna ketken shyǵyndardy óteidi. Eger múlik saqtandyrylǵan bolsa, ótemaqy qarastyrylmaidy.
10 mln teńgege deiingi shyǵyndar (taýarlar men materialdar boiynsha) – memlekettik kirister organdarynyń derekterine súiene otyryp, kásipkerdiń ortasha ailyq ainalymy nemese kirisi negizinde esepteledi. Eger kásipker usynylǵan somaǵa kelispese, ol sheshimdi sot-býhgalterlik nemese taýarlyq saraptama arqyly daýlaýǵa quqyly.
10 mln teńgeden asatyn shyǵyndar, sondai-aq jyljymaityn múlik pen jabdyq boiynsha tólemder – baǵalaý esepteri, aqaý aktileri jáne jobalyq-smetalyq qujattamalar negizinde anyqtalady.
Kásipkerler tótenshe jaǵdai jariialanǵan kúnnen bastap 180 kún ishinde ótinish bere alady. Osydan keiin akimattar bes jumys kúni ishinde zardap shekkenderdiń tizimin jasap, onda múlik ieleri, ótemaqy somasy, qarjylandyrý kózderi jáne biznes sanaty kórsetiledi.
