Qazaqstan halqy Assambleiasynyń (QHA) qyzmeti sońǵy jyldary aitarlyqtai jańardy. Bul týraly tarih ǵylymdarynyń kandidaty, professor, Assambleianyń ǵylymi-saraptamalyq tobynyń múshesi, T. Júrgenov atyndaǵy Qazaq ulttyq óner akademiiasynyń professory Mendyǵanym Jamalbekqyzy Shaimerdenova málimdedi. Dalanews.kz tilshisi professormen tildesip, assambleianyń jumysy men qoǵamdaǵy róli týraly áńgime órbitti.
Mendyǵanym Jamalbekqyzynyń aitýynsha, Prezident Qasym-Jomart Toqaev Assambleia qyzmetin jetildirýge erekshe nazar aýdaryp keledi.
– Memleket basshysy Assambleianyń inkliýzivti bolýyna jáne barlyq etnos ókilderiniń memlekettik úderisterge keńinen qatysýyna jaǵdai jasaýǵa basymdyq berip otyr, – deidi sarapshy. Onyń aitýynsha, bul baǵyt birlikti bekemdep, ultaralyq úilesimdi nyǵaitýǵa qyzmet etedi.
QHA – bilik pen qoǵam arasyndaǵy altyn kópir
Assambleianyń basty mindetteriniń biri – qoǵam men bilik arasyndaǵy bailanysty nyǵaitý. Bul týraly da Shaimerdenova ashyq aitty:
"QHA – el ishindegi úilesim men kelisimdi saqtaýǵa baǵyttalǵan saiasatty júzege asyrýdaǵy mańyzdy qural", – deidi professor.
Professordyń pikirinshe, qurmet pen ózara túsinistikke negizdelgen qoǵamdyq qatynastar qalyptastyrý – Assambleia jumysynyń ózegi.
"Bul rette Ulttyq quryltaidyń jumysyn erekshe atap ótýge bolady. Onda bolashaqqa baǵyttalǵan mańyzdy máseleler kóterildi. Assambleia osyndai mańyzdy talqylaýlarǵa dáneker bolyp otyr", – dedi ol.
Tildik ártúrlilik – basty qundylyqtardyń biri
Qazaqstan halqy Assambleiasy eldegi tildik alýandyqty qoldaýdy jalǵastyryp keledi.
"Bul búgingi kezeń úshin asa mańyzdy, – deidi professor Shaimerdenova. Onyń aitýynsha, etnosaralyq kelisim – tek saiasi ne mádeni negizde emes, tildik úilesim arqyly da qalyptasady. Assambleia músheleri men etnomádeni birlestikter uiymdastyratyn konferentsiialar, kongrester men mádeni sharalar – osy baǵyttaǵy naqty qadamdar.
Sonymen qatar, qazaq tilin memlekettik jáne biriktirýshi faktor retinde damytýǵa da kóńil bólinýde. Biraq bul basqa etnostardyń tilderi nazardan tys qalady degen sóz emes. Barlyq ult ókilderiniń tiline qurmet saqtalǵan", – dep túsindirdi sarapshy.
Qaqtyǵystardy sheshýdegi Assambleianyń róli
Assambleia tek mádeni, bilim berý baǵytynda ǵana emes, etnosaralyq shielenisterdiń aldyn alýǵa da úles qosyp keledi.
"QHA etnostyq negizdegi daýlardyń aldyn alýda deldal rólin atqaryp, taraptar arasyndaǵy dialogty uiymdastyrady. Bul jumys bilim berý bastamalary, dóńgelek ústelder, mádeni jobalar arqyly júzege asady", – dedi Shaimerdenova.
Onyń aitýynsha, bul máseleler tipti halyqaralyq deńgeidegi konferentsiialarda da kóteriledi. Bul QHA-nyń beibitshilikti saqtaýdaǵy mańyzyn dáleldeidi.
Qazaqstan halqy Assambleiasy – el ishindegi tatýlyq pen turaqtylyqty qamtamasyz etýde mańyzdy institýt. Onyń qazirgi qyzmeti jańasha serpin alyp, memleket pen qoǵam arasyndaǵy úilesimdi bailanystyń negizine ainalyp otyr.
Eske salaiyq, kúni keshe Prezident Qasym-Jomart Toqaev Assambleianyń basty mindetterin ataǵan bolatyn.
Birinshiden, Assambleia aimaqtardaǵy jumysty jandandyrýy kerek.
Ekinshiden, aqparattyq keńistikte birlik men kelisim ideialaryn keńinen dáripteý mańyzdy.
Úshinshiden, «Birligimiz – áralýandyqta» qaǵidatyn júzege asyrý úshin mádeniet pen ónerdiń áleýetin tolyq paidalanǵan durys.
