Memleket basshysy Qasym-Jomart Toqaev kapitaldyń zańsyz syrtqa shyǵarylýy men kiristerdi jylystatý eldiń ekonomikalyq qaýipsizdigine tikelei qater tóndiretinin málimdedi. Prezident bul týraly jańa salyq saiasatynyń iske asyrylý barysyna arnalǵan jiynda aitty, dep habarlaidy Dalanews.kz.
Toqaevtyń aitýynsha, jańa salyq saiasaty kúshine engennen keiin naqty ainalymdy jasyrý maqsatynda qolma-qol tólem kóleminiń artqany týraly málimetter túsken.
“Bólshek saýdamen ainalysatyn saýdagerler taýardyń aqysyn qolma-qol aqshamen nemese aýdarym arqyly tólegenine qarai salyq somasyn shegerip, eki túrli baǵa aita bastady. Buǵan, árine, kóz juma qaraýǵa bolmaidy. Óitkeni mundai áreketter memlekettiń salyqty ákimshilendirý tetikterin jetildirý baǵytyndaǵy eńbegin zaia ketiredi”, - dedi ol.
Sonymen qatar Prezident zańsyz kriptovaliýta operatsiialary arqyly kapital shyǵarý ózekti máselege ainalǵanyn aitty. Onyń málimetinshe, búginge deiin 62 milliard teńgeden astam qarjy ainalymy bolǵan 130 zańsyz kriptoalmasý qyzmeti joiylǵan.
“Osy isterdiń aiasynda 2,6 milliard teńgeniń múlkine tyiym salyndy”, - dedi ol.
Alaida Toqaevtyń aitýynsha, áleýmettik jelilerde aqshany kriptovaliýtaǵa aiyrbastaýǵa qatysty jarnamalar áli de toqtaǵan joq, bul máseleniń túbegeili sheshilmegenin kórsetedi.
“Halyqaralyq uiymdardyń baǵalaýynsha, elimiz syrtqa shyǵarylǵan kapitaldyń kólemi jaǵynan “kósh bastap turǵan memleketterdiń” biri. Al osyndai qylmys úshin sottalǵandar joqqa tán. Kapitaldyń zańsyz syrtqa ketýi ekonomikalyq qaýipsizdigimizge tikelei qater tóndiredi. Agenttik atalǵan máseleler boiynsha naqty usynys engizsin”, - dedi Toqaev.
