مەملەكەت باسشىسى قاسىم-جومارت توقايەۆ كاپيتالدىڭ زاڭسىز سىرتقا شىعارىلۋى مەن كىرىستەردى جىلىستاتۋ ەلدىڭ ەكونوميكالىق قاۋىپسىزدىگىنە تىكەلەي قاتەر توندىرەتىنىن مالىمدەدى. پرەزيدەنت بۇل تۋرالى جاڭا سالىق ساياساتىنىڭ ىسكە اسىرىلۋ بارىسىنا ارنالعان جيىندا ايتتى، دەپ حابارلايدى Dalanews.kz.
توقايەۆتىڭ ايتۋىنشا، جاڭا سالىق ساياساتى كۇشىنە ەنگەننەن كەيىن ناقتى اينالىمدى جاسىرۋ ماقساتىندا قولما-قول تولەم كولەمىنىڭ ارتقانى تۋرالى مالىمەتتەر تۇسكەن.
“بولشەك ساۋدامەن اينالىساتىن ساۋداگەرلەر تاۋاردىڭ اقىسىن قولما-قول اقشامەن نەمەسە اۋدارىم ارقىلى تولەگەنىنە قاراي سالىق سوماسىن شەگەرىپ، ەكى ءتۇرلى باعا ايتا باستادى. بۇعان، ارينە، كوز جۇما قاراۋعا بولمايدى. ويتكەنى مۇنداي ارەكەتتەر مەملەكەتتىڭ سالىقتى اكىمشىلەندىرۋ تەتىكتەرىن جەتىلدىرۋ باعىتىنداعى ەڭبەگىن زايا كەتىرەدى”، - دەدى ول.
سونىمەن قاتار پرەزيدەنت زاڭسىز كريپتوۆاليۋتا وپەراسيالارى ارقىلى كاپيتال شىعارۋ وزەكتى ماسەلەگە اينالعانىن ايتتى. ونىڭ مالىمەتىنشە، بۇگىنگە دەيىن 62 ميلليارد تەڭگەدەن استام قارجى اينالىمى بولعان 130 زاڭسىز كريپتوالماسۋ قىزمەتى جويىلعان.
“وسى ىستەردىڭ اياسىندا 2،6 ميلليارد تەڭگەنىڭ مۇلكىنە تىيىم سالىندى”، - دەدى ول.
الايدا توقايەۆتىڭ ايتۋىنشا، الەۋمەتتىك جەلىلەردە اقشانى كريپتوۆاليۋتاعا ايىرباستاۋعا قاتىستى جارنامالار ءالى دە توقتاعان جوق، بۇل ماسەلەنىڭ تۇبەگەيلى شەشىلمەگەنىن كورسەتەدى.
“حالىقارالىق ۇيىمداردىڭ باعالاۋىنشا، ەلىمىز سىرتقا شىعارىلعان كاپيتالدىڭ كولەمى جاعىنان “كوش باستاپ تۇرعان مەملەكەتتەردىڭ” ءبىرى. ال وسىنداي قىلمىس ءۇشىن سوتتالعاندار جوققا ءتان. كاپيتالدىڭ زاڭسىز سىرتقا كەتۋى ەكونوميكالىق قاۋىپسىزدىگىمىزگە تىكەلەي قاتەر توندىرەدى. اگەنتتىك اتالعان ماسەلەلەر بويىنشا ناقتى ۇسىنىس ەنگىزسىن”، - دەدى توقايەۆ.
