Prezident Qasym-Jomart Toqaev Úkimettiń keńeitilgen otyrysynda investitsiia tartýdaǵy qazirgi tásilderdiń tiimsiz ekenin ashyq aityp, memlekettik apparattyń qaǵazbastylyq pen úilesimsizdikten aryla almaǵanyn synǵa aldy, dep habarlaidy Dalanews.kz.
Memleket basshysynyń aitýynsha, investorlarmen jumys isteýdegi júiesizdik sapaly investitsiia tartýǵa tikelei kedergi keltirip otyr.
«Ashyǵyn aitýymyz kerek, investorlarmen jumystyń qazirgi tásilderi sapaly investitsiia tartýǵa kedergi keltirip otyr. Qaǵazbastylyq áli kóp, bir mindet birneshe organǵa qatar júktelgen», – dedi Prezident.
Toqaev bul máseleni byltyrǵy Joldaýynda da kótergenin eske saldy. Onyń aitýynsha, tiimsiz basqarý tájiribesin jalǵastyra berýge bolmaidy.
«Osyndai tiimsiz jumysty doǵarý qajet. Mekemeler arasynda birtutas ári ózara kelisilgen bailanys júiesin qalyptastyrý kerek. Bir sózben, sheshim qabyldaý jáne úilestirý jumysy bir jerden júzege asyrylýǵa tiis. Sheshim qabyldaý úderisin sozýǵa bolmaidy, ony tezdetý kerek», – dedi Memleket basshysy.
Prezident investitsiialyq jobalardyń taǵdyry kóp jaǵdaida birinshi basshynyń jaýapkershiligine bailanysty ekenin atap ótti. Bul turǵyda Investitsiialyq shtabtyń jumysyna jeke toqtaldy.
«Investitsiialyq shtab Roman Skliardyń arqasynda óz jumysyn jalpy tiimdi atqaryp otyr. Kóp nárse birinshi basshyǵa bailanysty. Olar investitsiialyq jobalardyń tiimdi júzege asyrylýyn qamtamasyz etýge tiis. Joba iske qosylǵannan keiin de investorǵa qoldaý kórsete berý kerek», – dedi Toqaev.
Memleket basshysy investitsiialyq jobalardyń jolynda ákimshilik kedergiler bolmaýy úshin turaqty monitoring qajet ekenin de qadap aitty.
«Jumys barysyna únemi monitoring júrgizip, ákimshilik kedergilerge jol bermeý qajet», – dedi ol.
Investorlardyń shaǵymy men máselesin tikelei jetkizetin jaýapty tulǵalar da naqty belgilendi.
«Men investitsiialar máselesimen ainalysatyn arnaiy kómekshini taǵaiyndadym. Sheteldik nemese otandyq investorlardyń suraqtary bolsa, Murat Nurtileýge Focal point retinde shaǵymdanýǵa bolady», – dedi Prezident.
Al halyqaralyq qarjy institýttarymen bailanysty Prezidenttiń keńesshisi, Strategiialyq josparlaý jáne reformalar agenttiginiń tóraǵasy Áset Erǵaliev júrgizetinin aitty.
Sonymen qatar Memleket basshysy investitsiialyq jobalardy iske asyrýdaǵy mańyzdy quraldardyń biri – uzaq merzimdi ofteik-kelisimsharttar máselesine toqtaldy. Onyń aitýynsha, bul baǵytta elde ortaq ári naqty ereje joq.
«Qazir elimizde mundai kelisimshart jasaýdyń biryńǵai ári túsinikti erejesi joq. Onyń ústine, memlekettik organdar selqostyq tanytýda. Sonyń saldarynan strategiialyq mańyzy bar birqatar investitsiialyq joba iske aspai jatyr», – dedi Qasym-Jomart Toqaev.
Prezident Úkimet pen Básekelestikti qorǵaý jáne damytý agenttigine bul máseleni jedel sheshýdi tapsyrdy.
«Osy máseleni sheshý úshin tiimdi sharalar qabyldaýdy tapsyramyn», – dep túiindedi Memleket basshysy.
