Memleket basshysy elimizdiń birqatar óńirindegi sý tasqynyna bailanysty qalyptasqan kúrdeli jaǵdaidy eskere otyryp, sondai-aq biýdjet qarjysyn únemdeý maqsatynda Úkimetke, ortalyq memlekettik jáne jergilikti atqarýshy organdarǵa imidjdik jáne basqa da iri is-sharalardy ótkizbeý jóninde tapsyrma berdi, dep habarlaidy Dalanews.kz.
“Men biýdjet qarjysyn únemdeý maqsatynda iri halyqaralyq forýmdy ótkizýden bas tarttym. Sonymen qatar Dúniejúzilik kóshpendiler oiyndaryna jumsalatyn shyǵyndy qysqartamyz. Árine, qazir bul sharadan túpkilikti bas tartý múmkin emes. Biraq oǵan jumsalatyn qarjy kólemi aitarlyqtai azaiady. Budan bólek, elimizdiń Tokioda ótetin Dúniejúzilik kórmege qatysýyna bólingen biýdjet te qysqarady”, – dedi Prezident.
Eske salaiyq, buǵan deiin memleket basshysy Qasym-Jomart Toqaev aǵymdaǵy jyldyń 13-14 maýsymynda bolatyn Astana halyqaralyq forýmyn ótkizbeý týraly sheshim qabyldady.
"Memleket basshysy Qasym-Jomart Toqaev elimizdegi joiqyn sý tasqynynyń saldaryn joiý jáne zardap shekken azamattarǵa kómektesý úshin basqa sharalarǵa jumsalatyn qarjyny barynsha únemdeý qajet ekenin eskere otyryp, biylǵy 13-14 maýsymǵa josparlanǵan Astana halyqaralyq forýmyn ótkizbeý týraly sheshim qabyldady", – dep málim etti Aqorda baspasóz qyzmeti.
Prezident forýmǵa shaqyrylǵan qonaqtar bul sheshimge túsinistikpen qaraidy dep senetinin jetkizdi. Astana halyqaralyq forýmy óz jumysyn 2025 jyly jalǵastyratyn bolady.
Astana halyqaralyq forýmy shetel úkimetteriniń, halyqaralyq uiymdardyń, iri kompaniialardyń, iskerlik jáne akademiialyq qaýymdastyqtyń joǵary laýazymdy delegattary arasyndaǵy dialog alańy boldy. Biyl forým ekinshi ret ótýge tiis edi.
Aita keteiik, búgin prezident Qasym-Jomart Toqaev Soltústik Qazaqstan oblysynyń sý basqan aýmaǵyn tikushaqpen aralap kórgennen keiin qarǵyn sý saldarynan evakýatsiialanǵan aýdandardyń halqymen kezdesti.
