Búgin Astanada Qasym-Jomart Toqaevtyń tóraǵalyǵymen Túrki memleketteri uıymyna múshe elderdiń Ortalyq (ulttyq) bankteri keńesiniń birinshi otyrysy ótti, dep habarlaıdy Dalanews.kz.
Aqorda baspasóz qyzmetiniń habarlaýynsha, jıyndy ashqan Prezıdent jýyrda Majarstanda ótken beıresmı samıtte Uıymǵa múshe memleketter basshylary yntymaqtastyqty tereńdetýdiń mańyzyn rastaǵanyn atap ótti. Tarıf saıasatynyń ózgerýinen týyndaǵan jahandyq ekonomıkanyń transformasıasy jaǵdaıynda munyń máni arta tústi.
Prezıdenttiń aıtýynsha, qazirgi kezdegi kúrdeli ózgerister qıyndyqtarmen qatar jańa múmkindikterge jol ashady. Ásirese, kólik jáne logıstıka, aýyl sharýashylyǵy, sıfrlandyrý men qarjy sıaqty negizgi salalarda kúsh-jigerdi úılestirý qajet.
"Bizdiń elderimizdiń álemdik İJÓ-degi jıyntyq úlesi 2010 jylǵy 2,4 paıyzdyq kórsetkishten 3,1 paıyzǵa deıin ulǵaıdy. Túrki memleketteri uıymynyń halyqaralyq rezervteri turaqty túrde ósip keledi. Bul aımaqtyń makroekonomıkalyq ornyqtylyǵynyń artqanyn kórsetedi", – dedi Prezıdent.
Memleket basshysy qarjy sektoryndaǵy yntymaqtastyqty keńeıtý barysynda ortalyq bankter negizgi ról atqaryp, ekonomıkalyq jáne ınvestısıalyq seriktestiktiń qozǵaýshy kúshine aınala alady dep sanaıdy
"Jıynnyń kún tártibine ekonomıkalyq úderisterge, aqsha-nesıe saıasatyna, sondaı-aq ortalyq bankterdiń sıfrlyq valútalary, krıptovalútalary jáne sıfrlyq aktıvteri, ıaǵnı, qarjy tehnologıalaryn damytýǵa qatysty ózekti taqyryptardyń engizilgeni qýantady. Qazaqstan bul salada aıtarlyqtaı jetistikke jetti. Atap aıtqanda, barlyq tranzaksıalar qurylymyndaǵy qolma-qol aqshasyz tólemderdiń úlesi 85 paıyzdy qurady. Bizdiń Ulttyq bank aımaqta birinshi bolyp sıfrlyq teńgeni engizdi. Jaqyn arada sıfrlyq aktıvterdiń, sonyń ishinde krıptovalútalardyń, steıblkoınderdiń jáne tokenızasıalanǵan quraldardyń qaýipsiz aınalymyn qamtamasyz etetin jańa erejelerdi qabyldaý josparlanyp otyr", – dedi Memleket basshysy.
Keńes sońynda Qasym-Jomart Toqaev ortalyq bankter arasyndaǵy kásibı dıalogtyń keńeıýi túrki elderiniń ekonomıkalyq áleýetin iske asyrý úshin berik negiz qalaıtynyna senim bildirdi.
Jıynda Qazaqstan Ulttyq bankiniń tóraǵasy Tımýr Súleımenov, Ázerbaıjan Ortalyq bankiniń tóraǵasy Taleh Tahır ogly Kázımov, Qyrǵyzstan Ulttyq bankiniń tóraǵasy Melıs Týrgýnbaev, Túrkıa Ortalyq bankiniń tóraǵasy Fatıh Karahan, Ózbekstan Ortalyq bankiniń tóraǵasy Tımýr Ishmetov jáne Majarstan Ortalyq bankiniń atqarýshy dırektory Gabor Soch sóz sóıledi.
