بۇگىن استانادا قاسىم-جومارت توقايەۆتىڭ توراعالىعىمەن تۇركى مەملەكەتتەرى ۇيىمىنا مۇشە ەلدەردىڭ ورتالىق (ۇلتتىق) بانكتەرى كەڭەسىنىڭ ءبىرىنشى وتىرىسى ءوتتى، دەپ حابارلايدى Dalanews.kz.

اقوردا باسپا ءسوز قىزمەتىنىڭ حابارلاۋىنشا، جيىندى اشقان پرەزيدەنت جۋىردا ماجارستاندا وتكەن بەيرەسمي سامميتتە ۇيىمعا مۇشە مەملەكەتتەر باسشىلارى ىنتىماقتاستىقتى تەرەڭدەتۋدىڭ ماڭىزىن راستاعانىن اتاپ ءوتتى. تاريف ساياساتىنىڭ وزگەرۋىنەن تۋىنداعان جاھاندىق ەكونوميكانىڭ ترانسفورماسياسى جاعدايىندا مۇنىڭ ءمانى ارتا ءتۇستى.

پرەزيدەنتتىڭ ايتۋىنشا، قازىرگى كەزدەگى كۇردەلى وزگەرىستەر قيىندىقتارمەن قاتار جاڭا مۇمكىندىكتەرگە جول اشادى. اسىرەسە، كولىك جانە لوگيستيكا، اۋىل شارۋاشىلىعى، سيفرلاندىرۋ مەن قارجى سياقتى نەگىزگى سالالاردا كۇش-جىگەردى ۇيلەستىرۋ قاجەت.

"ءبىزدىڭ ەلدەرىمىزدىڭ الەمدىك ىجو-دەگى جيىنتىق ۇلەسى 2010 جىلعى 2،4 پايىزدىق كورسەتكىشتەن 3،1 پايىزعا دەيىن ۇلعايدى. تۇركى مەملەكەتتەرى ۇيىمىنىڭ حالىقارالىق رەزەرۆتەرى تۇراقتى تۇردە ءوسىپ كەلەدى. بۇل ايماقتىڭ ماكروەكونوميكالىق ورنىقتىلىعىنىڭ ارتقانىن كورسەتەدى"، – دەدى پرەزيدەنت.

مەملەكەت باسشىسى قارجى سەكتورىنداعى ىنتىماقتاستىقتى كەڭەيتۋ بارىسىندا ورتالىق بانكتەر نەگىزگى ءرول اتقارىپ، ەكونوميكالىق جانە ينۆەستيسيالىق سەرىكتەستىكتىڭ قوزعاۋشى كۇشىنە اينالا الادى دەپ سانايدى

"جيىننىڭ كۇن تارتىبىنە ەكونوميكالىق ۇدەرىستەرگە، اقشا-نەسيە ساياساتىنا، سونداي-اق ورتالىق بانكتەردىڭ سيفرلىق ۆاليۋتالارى، كريپتوۆاليۋتالارى جانە سيفرلىق اكتيۆتەرى، ياعني، قارجى تەحنولوگيالارىن دامىتۋعا قاتىستى وزەكتى تاقىرىپتاردىڭ ەنگىزىلگەنى قۋانتادى. قازاقستان بۇل سالادا ايتارلىقتاي جەتىستىككە جەتتى. اتاپ ايتقاندا، بارلىق ترانزاكسيالار قۇرىلىمىنداعى قولما-قول اقشاسىز تولەمدەردىڭ ۇلەسى 85 پايىزدى قۇرادى. ءبىزدىڭ ۇلتتىق بانك ايماقتا ءبىرىنشى بولىپ سيفرلىق تەڭگەنى ەنگىزدى. جاقىن ارادا سيفرلىق اكتيۆتەردىڭ، سونىڭ ىشىندە كريپتوۆاليۋتالاردىڭ، ستەيبلكويندەردىڭ جانە توكەنيزاسيالانعان قۇرالداردىڭ ءقاۋىپسىز اينالىمىن قامتاماسىز ەتەتىن جاڭا ەرەجەلەردى قابىلداۋ جوسپارلانىپ وتىر"، – دەدى مەملەكەت باسشىسى.

كەڭەس سوڭىندا قاسىم-جومارت توقايەۆ ورتالىق بانكتەر اراسىنداعى كاسىبي ديالوگتىڭ كەڭەيۋى تۇركى ەلدەرىنىڭ ەكونوميكالىق الەۋەتىن ىسكە اسىرۋ ءۇشىن بەرىك نەگىز قالايتىنىنا سەنىم ءبىلدىردى.

جيىندا قازاقستان ۇلتتىق بانكىنىڭ ءتوراعاسى تيمۋر سۇلەيمەنوۆ، ازەربايجان ورتالىق بانكىنىڭ ءتوراعاسى تالەح تاحير وگلى كيازيموۆ، قىرعىزستان ۇلتتىق بانكىنىڭ ءتوراعاسى مەليس تۋرگۋنبايەۆ، تۇركيا ورتالىق بانكىنىڭ ءتوراعاسى فاتيح كاراحان، وزبەكستان ورتالىق بانكىنىڭ ءتوراعاسى تيمۋر يشمەتوۆ جانە ماجارستان ورتالىق بانكىنىڭ اتقارۋشى ديرەكتورى گابور سوچ ءسوز سويلەدى.