Memleket basshysy Qasym-Jomart Toqaev Japoniiada joǵary jetistikke jetken qazaqstandyq sýmoshy Ersin Baltaǵuldy qabyldady, dep habarlaidy Dalanews.kz.
Aqordanyń málimetinshe, Prezident sportshyny byltyr Imperator kýbogy týrnirinde «maegashira» ataǵyn ielenýimen jáne jarys qorytyndysy boiynsha «Kanto-se» – jaýyngerlik rýhqa beriletin arnaiy júldeni alýymen quttyqtady.
Qasym-Jomart Toqaev bul marapattyń tabandylyq pen qajyrly eńbektiń nátijesi ekenin atap ótti. Sonymen qatar shetelde júrip el namysyn qorǵap, Qazaqstandy álemge tanytyp júrgen jastar sany artyp kele jatqanyn aityp, memleket talantty sportshylardy qoldaýǵa erekshe kóńil bóletinin jetkizdi.
«Japoniiaǵa barǵan saparymda sizdiń Imperatordan bastap qarapaiym halyqqa deiin tanymal ekenińizdi baiqadym. Bul – úlken mártebe. Japoniiada júrip qazaq eliniń atyn shyǵaryp, abyroiyn asqaqtatyp júrsiz. Sizge rizashylyǵymdy bildiremin», – dedi Prezident.
Óz kezeginde Ersin Baltaǵul kórsetilgen qurmet úshin alǵys aityp, Qazaqstandaǵy jas sportshylarmen kezdesýdi josparlap otyrǵanyn aitty.
«Qazaqstan azamaty retinde maqsatymyz – kók týymyzdy 120 millionnan astam halqy bar Japoniiaǵa tanytý. Osy baǵytta eńbek etip kelemiz. Sonymen qatar Italiiadaǵy Qysqy Olimpiada oiyndarynda altyn medal jeńip alǵan otandasymyz Mihail Shaidorovtyń jetistigimen Sizdi jáne barsha qazaqstandyqtardy quttyqtaimyn», – dedi ol.
Kezdesý sońynda Memleket basshysy sportshyǵa aldaǵy halyqaralyq jarystarda tabys tilep, Qazaqstan men Japoniia arasyndaǵy dostyqty nyǵaitýǵa úles qosa berýine tilektestik bildirdi.
