Prezident "Samuryq-Qazyna" aktsionerlik qoǵamynyń basqarma tóraǵasy Nurlan Jaqypovty qabyldady, dep habarlaidy Dalanews.kz.
Memleket basshysyna qordyń biyl atqarǵan jumysynyń nátijeleri týraly málimet berildi.
Nurlan Jaqypov Qor tobynyń investitsiialyq portfelinde jalpy somasy 53 trillion teńge bolatyn 130-ǵa jýyq joba bar ekenin aitty. Sonyń ishinde osy jyly CASPI BITUM zaýytynyń qýatyn arttyrý, 50 MVt-tyq kún elektr stansasy jáne Kendirli eldi mekeninde sý tushytatyn zaýyt salý jobalary júzege asyryldy. Jyl sońyna deiin 1,1 trillion teńgege 9 iri jobany aiaqtap, paidalanýǵa berý josparlanyp otyr.
Prezidentke Jetisý oblysyndaǵy 84 eldi mekenge kógildir otyn jetkizetin Taldyqorǵan – Úsharal magistraldi gaz qubyrynyń, Aqtaýdaǵy konteiner haby men Almatydaǵy Zhetysu logistikalyq terminalynyń, sondai-aq Sany Re kompaniiasymen birlese jel generatorlaryna arnalǵan qondyrǵylar shyǵaratyn zaýyttyń iske qosylǵany jóninde málimet berildi.
Nurlan Jaqypov bergen málimetke sáikes, biyl on aida "Samuryq-Energo" AQ saǵatyna 31 milliard kVt elektr energiiasyn óndirdi. Bul Qazaqstandaǵy jalpy óndiristiń 31 paiyzyn quraidy. "Samuryq-Energo" AQ quramyna kiretin elektr stansalarynyń qýaty 7845 MVt-qa jetti.
2023-2025 jyldar aralyǵynda áleýmettik jobalardy qoldaýǵa jáne qaiyrymdylyq sharalaryna 1,5 trillion teńge bólingen. Bul qarjy meditsinalyq nysandarǵa, sondai-aq 55 ońaltý ortalyǵynyń, 31 inkliýziia kabinetiniń, 18 sport kesheniniń, mádeni jáne bilim berý mekemeleriniń qurylysyna jumsaldy. "Taza Qazaqstan" bastamasy aiasynda 5,8 million túp tal egildi.
Qasym-Jomart Toqaevqa "Samuryq-Qazyna" aktsionerlik qoǵamynyń otandyq biznesti órkendetýge qatysty bastamalary týraly baiandaldy.
Memleket basshysy qor jumysynyń tiimdiligin arttyrý, investitsiialyq jobalardy sapaly iske asyrý jáne ulttyq aktivterdiń uzaq merzimdi ornyqty damýyn qamtamasyz etý boiynsha birqatar tapsyrma berdi.
