Prezident Qarjylyq monitoring agenttiginiń tóraǵasy Janat Elimanovty qabyldady, – dep habarlaidy Dalanews.kz.
Qasym-Jomart Toqaevqa agenttik qyzmetiniń negizgi qorytyndylary týraly esep berilip, aldaǵy kezeńge arnalǵan mindetteri tanystyryldy.
Memleket basshysyna 300 qylmystyq isti tergep-tekserý aiaqtalǵany jóninde baiandaldy.
"Zardap shekken azamattarǵa 20 milliard teńgege jýyq ótemaqy qaitaryldy. Qarjy piramidalaryn uiymdastyrýshylardyń 2,2 milliard teńge bolatyn kriptovaliýta túrindegi qylmystyq tabystary buǵattaldy. Uiymdasqan 6 qylmystyq top joiylǵan. Olardyń biri - transulttyq top. Iri infraqurylymdyq jobalardy iske asyrýda 23 milliard teńge kólemindegi biýdjet qarjysy maqsatsyz jumsalýyna jol berilmedi", - dedi QMA ókili.
Prezidentke aǵash pen temirdiń zańsyz eksporttarynyń joly kesilgeni baiandaldy. Sondai-aq, janar-jaǵarmaidy zańsyz tasymaldaýdyń iri shemasy joiylǵany jaiynda aityldy. Bul ishki naryqtaǵy jaǵdaidy turaqtandyrýǵa múmkindik berdi.
Janat Elimanov azamattardy qarjy alaiaqtarynan qorǵaý, qaryz júktemesin azaitý boiynsha qabyldanyp jatqan sharalar týraly málimdedi.
"Zańsyz jumys istegen shaǵyn qarjy uiymdarynyń jelisi anyqtaldy. Olardan 327 myń azamat zardap shekken. Keltirilgen zalal mólsheri 30 milliard teńge bolady. 24 qarjy piramidasy joiyldy. Aldyn alý maqsatynda alaiaqtyq shemalardy taratqan 5,6 myń sait buǵattalyp, 22 myńnan asa múshesi bar 30 toptyq chat pen akkaýnt jabyldy", - dedi Janat Elimanov.
Qasym-Jomart Toqaevqa jastardy qylmystyq shemalarǵa tartýdyń aldyn alý úshin júrgizilip jatqan profilaktikalyq sharalar jóninde aqparat berildi. 2,8 myń oqý ornyndaǵy 567 myń oqýshyǵa qarjylyq qaýipsizdik boiynsha sabaqtar ótkizilgen. Mundai jumystar 100 joǵary oqý ornynda júrgizilip, 100 myńnan asa stýdentti qamtyǵan.
Budan bólek Janat Elimanov Parlament Májilisiniń qaraýyna kiristerdi jylystatýǵa qarsy kúres máseleleri boiynsha zańnamalyq túzetýler engizilgenin habarlady. Olar qabyldansa, Qazaqstan FATF standarttaryna tehnikalyq turǵydan tolyq sai keledi.
Memleket basshysy ekonomikalyq quqyqbuzýshylyqtyń aldyn alýdy, kóleńkeli ainalymnyń úlesin azaitýdy, zańsyz ielengen aktivterdi jylystatýǵa qarsy kúresti jalǵastyrýdy, sondai-aq, halyqtyń qarjylyq saýatyn arttyrýdy tapsyrdy.
