Qasym-Jomart Toqaev L.N. Gýmilev atyndaǵy Eýraziia ulttyq ýniversitetiniń Stýdentter úiine barǵan sátte qoǵamda talqylanyp jatqan metapnevmovirýsqa qatysty óz oiyn aitty, dep habarlaidy Dalanews.kz.
“Qazir bári jańa infektsiia týraly aityp jatyr. Menińshe, bul máseleni dabyra qylýdyń qajeti joq. Sondyqtan Qytaimen yntymaqtastyqty odan ári damytýymyz kerek,” – dedi Memleket basshysy.
Eske salaiyq, buǵan deiin Qytaida metapnevmovirýs infektsiiasy órship turǵany týraly jazǵan edik. 23–29 jeltoqsan aralyǵynda aýrýhanalarda alynǵan respiratorlyq synamalardy taldaý nátijesinde adamdardan tumaý virýsy, metapnevmovirýs jáne rinovirýs anyqtalǵan. Bul týraly Qytaidyń densaýlyq saqtaý basqarmasy málimdedi.
“Zertteý derekteri elde jedel respiratorlyq infektsiialardyń belsendi túrde taralyp jatqanyn kórsetti. Ásirese, metapnevmovirýsqa shaldyǵý deregi 14 jasqa deiingi balalar arasynda kúrt artqan. Bul jaǵdai ásirese soltústik provintsiialarda aiqyn baiqalady”, — dep jazdy RBK agenttigi.
Buǵan deiin Independent basylymy Qytaida respiratorlyq virýstardyń taralýy saldarynan aýrýhanalardyń adamǵa lyq tolǵanyn jazǵan edi.
“Biyl qysta Qytaidyń soltústik provintsiialarynda adamdardyń metapnevmovirýspen (HMPV) syrqattanýy kúrt artqan, ásirese bul infektsiia balalar arasynda keń taralǵan”, — dep málimdedi basylym.
Metapnevmovirýs belgileri tumaý men sýyq tiiýge uqsas keledi. Ádette, aýrý jeńil túrde ótedi. Alaida kei jaǵdailarda, ásirese náresteler, egde jastaǵy adamdar jáne immýniteti álsiz naýqastar arasynda pnevmoniia siiaqty aýyr asqynýlarǵa ákelýi múmkin.
Jeltoqsan aiynyń sońynda Taivannyń Money UDN basylymy metapnevmovirýs saldarynan ólim-jitim deńgeii 43%-ǵa jetýi múmkin ekenin jazdy. Basylym COVID-19 virýsyna qarsy jedel skrining quraldary bar ekenin, al metapnevmovirýsqa arnalǵan reagentterdiń jetispeitinin atap ótti. Sonymen qatar bul virýsqa qarsy arnaiy dári-dármek áli de joq, naýqastarǵa tek qoldaý terapiiasy usynylady.
