Memleket basshysy óz qarajatynan qosqan jeke jarna kólemi – 7 mln teńge.
QAZAQ TILI Endowment Qory halyqaralyq «Qazaq tili» qoǵamdyq uiymynyń bastamasymen qurylǵan. Negizgi mindeti – memlekettik tildi qoldaý jáne damytýmen ainalysatyn elimizdegi eń iri uiym – «Qazaq tili» qoǵamynyń turaqty ári uzaqmerzimdi damýyn qamtamasyz etý.
Biyl 12 qazanda QR Prezidenti Qasym-Jomart Toqaev «Qazaq tili» qoǵamynyń basshysymen kezdesýinde memlekettik tildi damytý maqsatymen arnaiy endaýment qoryn qurý bastamasyna qoldaý bildirgen bolatyn.
Endaýment qorynyń ereksheligi – qorǵa jinalǵan qarjy jumsalmaidy. Qarajat tolyqtai basqarýǵa beriledi jáne investitsiialanady. Endaýment qorynyń investitsiialyq qyzmetinen túsken tabysy benefitsiar uiymnyń jarǵylyq mindetterin oryndaýǵa jumsalady. Álem elderinde bilim berý men áleýmettik baǵytta jumys isteitin qoǵamdyq uiymdardyń turaqty ári uzaqmerzimdi qyzmetin qamtamasyz etý úshin endaýment qoryn qurý tájiribesi keń taralǵan.
Qazirgi tańda Japoniiadaǵy ǵylym men tehnologiia qory, sonymen qatar, Stenford, Garvard ýniversitetteriniń qorlary dúnie júzindegi eń iri endaýment qorlarynyń qataryna kiredi. Elimizde iri ýniversitetter, mektepter men kommertsiialyq emes uiymdardyń endaýment qorlary sátti jumys istep jatyr.
QAZAQ TILI Endowment Qory-na jinalǵan qarajatty bedeldi qoǵam qairatkerleri, ǵalym-lingvister men memleket ókilderinen quralǵan táýelsiz qamqorshylar keńesi baqylap, qadaǵalaityn bolady.
Endaýment qorynan túsken tabys halyqaralyq «Qazaq tili» qoǵamynyń jumysyn qamtamasyz etý jáne memlekettik tildi damytý, modernizatsiialaý men ony qoldaný aiasyn keńeitýge baǵyttalǵan jobalarǵa grant negizinde berilip otyrady.
Prezident «Qazaq tili» qoǵamyna memlekettik tildegi media jáne baspa kontentin kóbeitý úshin naqty jobalar men sharalar keshenin júzege asyrý, tildi oqytý men úiretý ádistemesin jetildirý, oqý saýattylyǵy men jazý mádenietin damytý, sonymen qatar, qazaq tilin qoldaý men tildi qoldanatyn qaýymdastyq aiasyn keńeitý úshin zamanaýi tehnologiialyq sheshimderdi keńinen paidalanýdy tapsyrdy.
Halyqaralyq «Qazaq tili» qoǵamy memlekettik tildiń janashyrlary atynan QR Prezidenti Qasym-Jomart Kemeluly Toqaevqa bastamaǵa bildirgen qoldaýy men ózgelerge kórsetken úlgisi úshin alǵys aitady.
