Memleket basshysy qazir elimiz tarihi órleý dáýirine qadam basqanyn jetkizip, elde bolyp jatqan eleýli ózgeristerge toqtaldy, dep habarlaidy dalanews.kz.
Bul týraly Prezident VI Dúniejúzilik kóshpendiler oiyndarynyń jeńimpazdary men júldegerlerin marapattaý rásiminde aitty.
"Biz birtutas el bolyp asa aýqymdy reformalardy tabysty júzege asyrdyq. Barsha jurtymyzǵa, ásirese, óskeleń urpaqqa baǵdar beretin Konstitýtsiiamyzdy qabyldadyq. Ádiletti, Kúshti, Ozyq, Taza Qazaqstannyń berik negizin qaladyq. Muny ult tarihyndaǵy naǵyz betburysty oqiǵa dep baǵalaýǵa bolady. Konstitýtsiia – halqymyzdyń temirqazyǵy, el ishindegi túbegeili ózgeristerge tyń serpin bergen qasterli qujat. Taiaýda ǵana Quryltai sailaýy ótti. Quryltaiǵa kásibi, isker, jańashyl azamattar kirdi. Olardyń ishinde jastar da az emes. Vitse-prezident taǵaiyndaldy. Jańartylǵan Úkimet jumysyna kiristi. Qaýipsizdik Keńesiniń apparaty jasaqtaldy", - dedi Toqaev.
Qasym-Jomart Toqaevtyń aitýynsha, kóp uzamai Qazaqstan Halyq Keńesiniń quramy bekitiledi.
"Quryltaidyń kelisimimen Konstitýtsiialyq sot sýdialary, Ortalyq sailaý komissiiasy men Joǵary aýditorlyq palatanyń músheleri taǵaiyndalady. Osylaisha, elimizdiń negizgi memlekettik institýttary tolyq jańǵyrtylady. Bul da - aýqymdy reformalarymyzdyń óte mańyzdy bóligi. Al qazanda men Konstitýtsiianyń 46-babyna sáikes Qazaqstan halqyna joldaýymdy jasap, aldaǵy josparymyzdy aiqyndaimyn", – dedi Memleket basshysy.
