Memleket basshysy Qasym-Jomart Toqaev Qarjylyq monitoring agenttiginde jiyn ótkizdi, dep habarlaidy Dalanews.kz.
Prezident sala mamandaryn kásibi merekesimen quttyqtap, osydan bes jyl buryn, el ishinde aýqymdy ózgerister qolǵa alynyp jatqan tarihi kezeńde qurylǵan Qarjylyq monitoring agenttigi ózine júktelgen jaýapkershilik pen mindetti abyroimen oryndap kele jatqanyna nazar aýdardy.
"Jalpy, osyndai qysqa merzim ishinde kóp jumys isteldi, biraz tájiribe jinaqtaldy. Búginde Qarjylyq monitoring agenttigi elimizdiń ekonomikalyq jáne ulttyq qaýipsizdik júiesinde mańyzdy ról atqaratyn derbes qurylymǵa ainaldy. Muny tabandy eńbek pen adal qyzmettiń nátijesi deýge bolady. Agenttik qyzmetkerlerine rizashylyǵymdy bildiremin. Biraq bosańsýǵa bolmaidy. Sebebi aldymyzda biik maqsattar men aýqymdy jumys bar. Ásirese, qazir óte qarqyndy damyp jatqan tsifrlyq tehnologiia men jasandy intellekt dáýirinde jumysqa túbegeili jańa kózqaraspen qaraý mindeti tur. Bul másele týraly "Turkistan" gazetine bergen suhbatymda jáne Ulttyq quryltai otyrysynda anyq aittym", – dedi Qasym-Jomart Toqaev.
Prezident tsifrlyq tásilderdi jáne jasandy intellekt júiesin Agenttik qyzmetine jappai engizý – kezek kúttirmeitin asa mańyzdy mindet ekenin atap ótti.
"Onsyz tiimdi jumys bolmaityny anyq. Qazir kúshtik qurylymdar men qylmys áleminiń arasyndaǵy kúres tehnologiialyq turǵydan múlde basqa sipatqa ie boldy. Qaraqshylar, iaǵni qylmyskerler jasandy intellektini belsendi paidalanatyn boldy. Ony sizder jaqsy bilesizder. Quqyq qorǵaý mekemeleri, sonyń ishinde Qarjylyq monitoring agenttigi tehnologiialyq turǵydan artta qalyp qoisa, bul jaǵdai ulttyq qaýipsizdigimizge qater tóndirýi múmkin. Zaman talabyna sai ozyq bolý úshin, eń aldymen, durys sheshim qabyldap, tiimdi áreket etýimiz kerek. Quqyq qorǵaý organdary tiianaqty, belsendi jumys istep, ozyq tsifrlyq sheshimder arqyly eldegi ózgeristerdiń jedel jáne sapaly iske asýyna septigin tigizýi múmkin. Bul aýqymdy ekonomikalyq jańǵyrý jolyna bet burǵan Qazaqstan úshin óte mańyzdy qadam bolmaq", – dedi Memleket basshysy.
