Memleket basshysy Kólik ministri Marat Qarabaevty qabyldady, – dep habarlaidy Dalanews.kz.
Qasym-Jomart Toqaevqa ministrliktiń byltyr atqarǵan jumysynyń qorytyndysy boiynsha esep berilip, aldaǵy kezeńge arnalǵan jospary tanystyryldy.
Marat Qarabaevtyń aitýynsha, byltyr kóliktiń barlyq túri boiynsha tasymal kólemi 6 paiyzǵa ósken.
"Transkaspii halyqaralyq kólik dálizi arqyly júk tasymaldaý 62 paiyzǵa ulǵaiyp, 4,5 million tonna boldy. Almaty, Qyzylorda jáne Shymkent qalalarynyń áýejailarynda 3 jańa jolaýshylar terminaly salyndy. 12 myń shaqyrym jol jóndeldi. Qaraǵandy – Almaty, Taldyqorǵan – Óskemen, Aqtóbe – Qandyaǵash jáne Atyraý – Astrahan tas joldaryndaǵy jańǵyrtý jumystary aiaqtaldy", - dedi ministr.
Ministrdiń málimetinshe, otandyq áýe kompaniialary 14,7 million jolaýshyny tasymaldaǵan. Bul sektordaǵy kórsetkish 10 paiyzǵa ulǵaiǵan. Áýejailarda 29,7 million adamǵa qyzmet kórsetilgen, iaǵni 14 paiyzǵa artqan. Temirjol kóligimen 21 million jolaýshy tasymaldanyp, ósim 3,9 paiyzdy quraǵan.
Qasym-Jomart Toqaevqa biyl vedomstvonyń Eýropa, Aziia jáne Taiaý Shyǵys elderine 19 jańa áýe baǵytyn ashýdy josparlap otyrǵany jóninde baiandaldy.
"Katonqaraǵai, Zaisan jáne Kendirli áýejailarynyń qurylysy bastaldy. Sonymen qatar 125 temirjol beketin jańǵyrtý jumystary qolǵa alynady. Dostyq – Moiynty, Almaty ainalma temirjoly, Darbaza – Maqtaaral, Aiagóz – Baqty jáne Qyzyljar – Moiynty sekildi 5 iri temirjol jobasy júzege asyrylyp jatyr", - dedi ministr.
Kezdesý sońynda Prezident qazaqstandyqtardyń jol júrýine anaǵurlym qolaily jaǵdai jasaý, týristik nysandarǵa qoljetimdilikti qamtamasyz etý qajet ekenin atap ótti.
Memleket basshysy Ortalyq – Batys avtojolynyń qurylysyn jedeldetý, Batys Eýropa – Batys Qytai dálizin keńeitý, Transkaspii halyqaralyq kólik dálizin damytý, ishki jáne halyqaralyq áýe reisteriniń sanyn kóbeitý, kólik sektoryna investitsiia tartý jumysyn kúsheitý jóninde tapsyrma berdi.
Qasym-Jomart Toqaev kólik-logistika salasyn órkendetýdiń, sondai-aq, kólik infraqurylymyn jańǵyrtý jobalaryn sapaly ári ýaqtyly júzege asyrýdyń mańyzyna erekshe nazar aýdardy.
