مەملەكەت باسشىسى كولىك ءمينيسترى مارات قارابايەۆتى قابىلدادى، – دەپ حابارلايدى Dalanews.kz.
قاسىم-جومارت توقايەۆقا مينيسترلىكتىڭ بىلتىر اتقارعان جۇمىسىنىڭ قورىتىندىسى بويىنشا ەسەپ بەرىلىپ، الداعى كەزەڭگە ارنالعان جوسپارى تانىستىرىلدى.
مارات قارابايەۆتىڭ ايتۋىنشا، بىلتىر كولىكتىڭ بارلىق ءتۇرى بويىنشا تاسىمال كولەمى 6 پايىزعا وسكەن.
"ترانسكاسپيي حالىقارالىق كولىك ءدالىزى ارقىلى جۇك تاسىمالداۋ 62 پايىزعا ۇلعايىپ، 4،5 ميلليون توننا بولدى. الماتى، قىزىلوردا جانە شىمكەنت قالالارىنىڭ اۋەجايلارىندا 3 جاڭا جولاۋشىلار تەرمينالى سالىندى. 12 مىڭ شاقىرىم جول جوندەلدى. قاراعاندى – الماتى، تالدىقورعان – وسكەمەن، اقتوبە – قاندىاعاش جانە اتىراۋ – استراحان تاس جولدارىنداعى جاڭعىرتۋ جۇمىستارى اياقتالدى"، - دەدى مينيستر.
ءمينيستردىڭ مالىمەتىنشە، وتاندىق اۋە كومپانيالارى 14،7 ميلليون جولاۋشىنى تاسىمالداعان. بۇل سەكتورداعى كورسەتكىش 10 پايىزعا ۇلعايعان. اۋەجايلاردا 29،7 ميلليون ادامعا قىزمەت كورسەتىلگەن، ياعني 14 پايىزعا ارتقان. تەمىرجول كولىگىمەن 21 ميلليون جولاۋشى تاسىمالدانىپ، ءوسىم 3،9 پايىزدى قۇراعان.
قاسىم-جومارت توقايەۆقا بيىل ۆەدومستۆونىڭ ەۋروپا، ازيا جانە تاياۋ شىعىس ەلدەرىنە 19 جاڭا اۋە باعىتىن اشۋدى جوسپارلاپ وتىرعانى جونىندە باياندالدى.
"كاتونقاراعاي، زايسان جانە كەندىرلى اۋەجايلارىنىڭ قۇرىلىسى باستالدى. سونىمەن قاتار 125 تەمىرجول بەكەتىن جاڭعىرتۋ جۇمىستارى قولعا الىنادى. دوستىق – مويىنتى، الماتى اينالما تەمىرجولى، داربازا – ماقتاارال، اياگوز – باقتى جانە قىزىلجار – مويىنتى سەكىلدى 5 ءىرى تەمىرجول جوباسى جۇزەگە اسىرىلىپ جاتىر"، - دەدى مينيستر.
كەزدەسۋ سوڭىندا پرەزيدەنت قازاقستاندىقتاردىڭ جول جۇرۋىنە اناعۇرلىم قولايلى جاعداي جاساۋ، تۋريستىك نىساندارعا قولجەتىمدىلىكتى قامتاماسىز ەتۋ قاجەت ەكەنىن اتاپ ءوتتى.
مەملەكەت باسشىسى ورتالىق – باتىس اۆتوجولىنىڭ قۇرىلىسىن جەدەلدەتۋ، باتىس ەۋروپا – باتىس جۇڭگو ءدالىزىن كەڭەيتۋ، ترانسكاسپيي حالىقارالىق كولىك ءدالىزىن دامىتۋ، ىشكى جانە حالىقارالىق اۋە رەيستەرىنىڭ سانىن كوبەيتۋ، كولىك سەكتورىنا ينۆەستيسيا تارتۋ جۇمىسىن كۇشەيتۋ جونىندە تاپسىرما بەردى.
قاسىم-جومارت توقايەۆ كولىك-لوگيستيكا سالاسىن وركەندەتۋدىڭ، سونداي-اق، كولىك ينفراقۇرىلىمىن جاڭعىرتۋ جوبالارىن ساپالى ءارى ۋاقتىلى جۇزەگە اسىرۋدىڭ ماڭىزىنا ەرەكشە نازار اۋداردى.
