Memleket basshysy Qazaqstanǵa saparmen kelýge shaqyrýyn qabyl alǵany úshin Vladımır Pýtınge alǵys aıtty,dep habarlaıdy Dalanews.kz.
"Bul strategıalyq seriktestik pen odaqtastyqqa berik negizdelgen memleketaralyq qarym-qatynasymyzdaǵy óte mańyzdy oqıǵa ekeni sózsiz. Sizdiń qazaqstandyq aqparat quraldarynda jarıalanǵan búgingi maqalańyzdy muqıat oqyp shyqtym. Al meniń maqalam Reseı baspasózinde jarıalandy. Biz bolashaqqa baǵyttalǵan ekijaqty yntymaqtastyqty damytý jónindegi kósheli oılarymyzdy jan-jaqty jetkizdik. Óz maqalamda Qazaqstan osyndaı kúrdeli kezeńde Reseıdiń senimdi strategıalyq seriktesi ári odaqtasy ekenin jáne aldaǵy ýaqytta da bul baǵyttan aınymaıtynyn atap óttim", – dedi Qazaqstan Prezıdenti.
Qasym-Jomart Toqaevtyń aıtýynsha, Qazaqstan men Reseı ekijaqty seriktestiktiń oń qarqynyn saqtap qana qoımaı, ony eseleı túsken.
"Sizdiń búgingi saparyńyzdyń kún tártibi óte aýqymdy. Sapar qarsańynda Úkimet músheleri kezdesip, biz talqylaıtyn barlyq máseleni pysyqtady. Búgin óte mańyzdy qujattardy qabyldaımyz. Bul 20 kelisimnen turatyn qujattar bizdiń tatý kórshilik jáne seriktestik rýhyndaǵy yntymaqtastyǵymyzdy odan ári damytýǵa tyń serpin beredi", – dedi Memleket basshysy.
Reseı Prezıdenti Vladımır Pýtın qazaq jerinde kórsetilgen erekshe syı-qurmet úshin Qasym-Jomart Toqaevqa alǵys aıtty.
"Sizge zor rızashylyǵymdy bildiremin. Biz dostas eldermiz. Qarqyndy damyp kele jatqan iskerlik qarym-qatynasty da qoldaımyz. Udaıy baılanystamyz. Ózińizdi jyl sońynda Sankt-Peterbýrgte ótetin TMD aıasyndaǵy beıresmı kezdesýde kútemin. Sondaı-aq Uly Jeńistiń 80 jyldyǵyna arnalǵan saltanatty sharaǵa shaqyramyn. Bul – bizdiń ortaq jeńisimiz", – dedi Vladımır Pýtın.
Reseı Prezıdenti ekijaqty baılanystardyń qarqynyn joǵary baǵalap, memlekettik saparynyń máni men mańyzyna toqtaldy.
"Búgingi kelissózderdiń qorytyndysy boıynsha birqatar qujat qabyldanady. Olardyń qatarynda Birlesken málimdeme jáne túrli saladaǵy yqpaldastyǵymyzǵa qatysty qujattar bar. Reseı Qazaqstannyń eń iri saýda-ekonomıkalyq seriktesiniń biri bolyp qala beredi. Saýda aınalymy ósti, byltyr onyń kólemi 28,5 mıllıard dollardy qurady. Qazaqstan ekonomıkasyna quıylǵan ınvestısıa 13 mıllıard dollarǵa jetti. Árıne, biz azamattyq qoǵam, bilim, ǵylym jáne mádenıet baǵytynda damyp kele jatqan gýmanıtarlyq baılanystarymyzdy baǵalaımyz. Bul turǵyda Reseıde bilim alatyn sheteldik stýdentterdiń basym bóligin qazaqstandyq jastar quraıtynyn aıtsaq jetkilikti. Aımaqaralyq yntymaqtastyq ta tabysty órbip keledi. Búgin Ýfada kezekti is-shara ótip jatyr. Sizge Reseı-Qazaqstan yntymaqtastyǵyn damytýǵa erekshe nazar aýdarǵanyńyz úshin alǵys aıtamyn. Biz Qazaqstan Prezıdentiniń osynaý mańyzdy jumystarǵa árdaıym yqylas qoıyp otyratynyn jaqsy sezinemiz. Qazaqstandy adal dosymyz jáne jaqyn odaqtasymyz dep tanımyz", – dedi Reseı Prezıdenti.
Kelissóz barysynda memleketter basshylary ónerkásip kooperasıasy, energetıka, munaı-gaz ónerkásibi, energıa resýrstarynyń tasymaly, mashına jasaý, kólik-logıstıka, qarjy, ekologıa, sý saıasaty, bilim berý, ǵylym jáne mádenı-gýmanıtarlyq salalardaǵy yqpaldastyqty damytý perspektıvasyn talqylady.
