Qasym-Jomart Toqaev pen Sadyr Japarov kelissóz júrgizdi, dep habarlaidy Dalanews.kz.
Qazaqstan Prezidenti baýyrlas Qyrǵyz Respýblikasyna resmi saparmen kelýge shaqyrǵany úshin Sadyr Japarovqa alǵys aitty.
"Bul sapar eki el arasyndaǵy dostyq qatynastyń damýyna tyń serpin beredi dep senemin. Shyn máninde, qazaq pen qyrǵyz – tilektes, baýyrlas elder. Bizdiń tarihymyz tamyrlas, salt-dástúrimiz ben tanym-túsinigimiz, ulttyq bolmysymyz uqsas. Qos halyqtyń tatýlyǵy men ózara qurmeti eshqashan úzilgen emes. Qazir de yqpaldastyǵymyz strategiialyq seriktestik rýhynda qarqyndy damyp keledi. Biz barlyq deńgeide ózara qurmetke negizdelgen saiasi dialog ornattyq. Memleketaralyq, parlamentaralyq jáne úkimetaralyq keńesterimiz tabysty jumys istep keledi. Sondai-aq, óńiraralyq bailanystardy damytyp jatyrmyz. Jalpy eki eldiń arasynda jan-jaqty ári tyǵyz yntymaqtastyq ornaǵan", – dedi Qasym-Jomart Toqaev.
Memleket basshysy Qyrǵyzstan Prezidentiniń ekijaqty yqpaldastyqty jańa deńgeige kóterýge zor úles qosqanyna nazar aýdardy.
"Men muny joǵary baǵalaimyn. Qajyrly eńbegińizdiń arqasynda Qyrǵyzstanda kóptegen oń ózgeris bolyp jatyr. Siz halyqtyń ál-aýqatyn jaqsartýdy kózdeitin mańyzdy bastamalardy júzege asyryp kelesiz. El ekonomikasynyń jyl basynan beri 11,7 paiyzǵa ósýi – osynyń aiqyn dáleli. Biz baýyrlas eldiń jetistikterine qýanamyz. Qyrǵyzstanmen aradaǵy yntymaqtastyqty barynsha nyǵaitýǵa airyqsha mán beremiz", – dedi Memleket basshysy.
Sadyr Japarov shaqyrýyn qabyl alyp, Qyrǵyzstanǵa resmi saparmen kelgeni úshin Qazaqstan Prezidentine rizashylyǵyn jetkizdi.
"Sizdi Qyrǵyzstanda kórnekti memleket qairatkeri jáne halyqaralyq deńgeidegi tájiribeli diplomat retinde biledi. Sońǵy jyldary sizdiń qoldaýyńyzben eki eldiń qarym-qatynasy jańa deńgeige ótip, dostyǵymyz ben baýyrlastyǵymyzdyń bekemdele túsýi bizdi qýantady. Qazaq eli – biz úshin erekshe el. Bizdiń mámilelerimiz Toqtoǵul men Abaidai, Shyńǵys pen Muhtardai atalarymyz salǵan izbenen jalǵasqan. Tarihi muramyzdy umytpai, keleshek býynǵa jetkizýdi negizgi maqsatymyz dep esepteimin. Óz tarapymnan ózara qarym-qatynasymyzdy odan ári ilgeriletýge daiynmyn. Bizdiń negizgi kúshimiz – eki eldiń yntymaǵy men birligi", – dedi Qyrǵyzstan prezidenti.
