Dalanews.kz sarapshynyń pikirin oqyrman nazaryna usynady.
...
«Nur Otan» partıasy saıası keńesiniń otyrysynda Mámın úkimeti otstavkaǵa ketedi dep kútken edik. Alaıda Asqar myrza jyly ornyn saqtap qaldy. Úkimetti ornynan qozǵaý týraly másele keıinge shegerildi. Alaıda bul kúni bizdi basqa bir tosyn syı kútip turdy. Bul Mámınniń otstavkasyna qaraǵanda áldeqaıda mańyzdy, saıası saldary bar kadrlyq sheshim-tuǵyn.
Nursultan Nazarbaev «Nur Otannan» ketip, partıa tóraǵasynyń mindetin Toqaevqa tapsyratynyn málimdedi.
Elbasynyń osydan eki jyldan asa ýaqyt buryn, 2019 jyldyń naýryzynda prezıdenttik oryntaǵyn bosatqany este.
Prezıdenttik mindetti Toqaevqa júktegenimen, Qaýipsizdik Keńesiniń basshysy, Nur Otan partıasynyń jetekshisi, Qazaqstan halqy Assambleıasy jáne «Samuryq Qazyna» qoryndaǵy tóraǵalyq fýnksıasyn saqtap qaldy.
Nazarbaev memleketti Toqaevqa tolyq tabystaǵandaı kóringenmen, eldegi turaqtylyqty shaıqaltpaý úshin qaýipsizdik salasy, kvazımemlekettik sektor jáne bıleýshi partıadaǵy oryntaǵyn ózine qaldyrdy.
Odan beri eki jarym jyl zyrǵyp óte shyqty. Toqaev Nazarbaevtyń murageri bolýǵa laıyqty tulǵa ekenin dáleldedi. Óz betimen sheshim qabyldaýǵa qabiletti ekenin, memleketti durys baǵytqa bastaı alatynyn kórsetti.
Toqaev bılikke kele sala Nazarbaevty tyqsyrǵan joq, kerisinshe eks-prezıdent pen ekinshi prezıdent para-para, teń dárejede bılik quratyn ózindik saıası júıe qalyptasty. Bul óz kezeginde eldegi yntymaq pen yrysty saqtaýǵa septesip, turaqtylyqtyń irgesin bekite tústi.
«Nur Otanǵa» deıin Nazarbaev Qazaqstan halqy Assembleıasyndaǵy tóraǵalyqty Toqaevqa ótkizip berdi. Osy rásimde memlekettik saıasattyń nege negizdelýi kerektigin nyqtap, osy taraptaǵy 5 ustanymyn ortaǵa salǵan.
Bular:
Memleket pen turǵyndar arasyndaǵy senim men áriptestikke qurylǵan qazaqstandyq patrıotızm. Azamattyq qoǵamnyń belsendiligi. Memlekettiń tildi eldi bir judyryqqa jumyldyrar qýaty. Túrli ult pen ulysty biriktirgen Qazaqstan osy faktordy tıimdi paıdalaný kerek jáne ultty udaıy modernızasıalaý ustanymynan taımaý.
...
Endigi kezek partıaǵa kelgen sekildi. Elbasy alysty boljaıtyn, strategıalyq sheshim qabyldady. Eń aldymen «Nazarbaev bılikten ketkisi joq» deıtin synshylardyń aýzyna qum qoıdy, ekinshiden Toqaevqa tolyq bılik berilýi tıis deıtin eldiń pikirin esepke aldy.
«Barsha qazaqstandyqtar Toqaevtyń tóńiregine toptasyp, onyń memlekettik saıasattaǵy baǵyt-baǵdaryna qoldaý kórsetýi qajet. Qazirgi prezıdenttiń ıdeıalaryn iske asyrýǵa barlyǵymyz atsalysýymyz kerek.
"Nur Otan"? Men bul partıanyń bastaýynda turdym. Osy kúnge deıin tóraǵalyq mindetimdi múltiksiz atqardym jáne partıaǵa qandaı sheshim paıdaly bolatynyn beske bilemin. «Nur Otandy» Memleket basshysy basqarýy tıis, budan utpasa, utylmaıdy. Bul men úshin óte-móte mańyzdy sheshim, buǵan barmas buryn on oılanyp, júz tolǵandym», – dedi Nazarbaev.
Negizinde «Nur Otan» tek saıası ınstıtýt emes, sonymen qatar prezıdenttiń saıasatyn alǵa jyljytatyn mańyzdy qural. Prezıdenttiń saıası baǵyt-baǵdaryn júzege asyrý birinshi kezekte «Nur Otanǵa» júkteledi. Memleket pen qoǵamnyń arasynda ótkel ornatý da bıleýshi partıanyń jumysy.
Másele «Nur Otan» ózine júktelgen isti oıdaǵydaı oryndap otyr ma? Nazarbaevtyń tusyndaǵy «Nur Otan» memleket pen qoǵamdy baılanystyratyn tıimdi ınstıtýtqa aınala aldy ma? Partıa Toqaevtyń tusynda qalaı túrlenedi?
Anyǵy, jyl basynda Assembleıany qolyna qaratqan, kúni keshe «Nur Otan» partıasynyń tóraǵasy atanǵan Qasym-Jomart Toqaevtyń memlekettik saıasattaǵy yqpaly pen bıligi kúsheıe tústi. Al bul oǵan júktelgen jaýapkershiliktiń arta túsetinin bildiredi.
Baıqar bolsańyz, Toqaev «tranzıt» degen termındi asa unatpaıdy. 2019 jylǵy prezıdent saılaýynan keıin bul máselege múlde núkte qoıyp, tranzıttiń támám bolǵanyn málimdegen. Iaǵnı, Nazarbaevtyń bılikten birjolata ketkenin, qazirgi ári naq prezıdent Toqaev ekenin emeýrinmen ańǵartqan.
Alaıda Nazarbaev Toqaevty tejep otyratyn túrli tásilderdi kúni buryn qarastyryp qoıǵan edi. Qaýipsizdik keńesi men «Nur Otandaǵy» tóraǵalyq elde qos bılik ornaǵan degen qaýesetti qozdata tústi.
Nazarbaev muny jeke múddesi úshin jasaǵan joq, bılikten birden kete salsa eldegi yrys pen yntymaqtyń, birlik pen beıbitshiliktiń shańyraǵy shaıqalyp kete me dep qaýiptendi.
Memleketti Toqaevta tabystarda azdaǵan kúmán-kúdigi bolǵan da shyǵar, muny seıiltý úshin Nazarbaevqa ýaqyt qajet boldy. Araǵa eki jyl salyp Nazarbaev el bıligi senimdi qolda ekenine anyq kózi jetti.
Elbasynyń «Nur Otandy» Toqaevqa tabystaýy aldaǵy prezıdent saılaýyna kim túsedi degen talqy-talasqa núkte qoıdy.
Toqaev 2024 jylǵy prezıdent saılaýynda ekinshi merzimge ótýge tyrysady. Muny Nazarbaevtyń ózi quptap otyr. Dál qazir eldegi bılik Toqaevtyń qolynda. Budan bylaı onyń saıası belsendiligi arta túsedi, bıliktegi aýys-túıister tek Toqaevtyń qalaýymen jasalatyn bolady. Buǵan qazirdiń ózinde dálel kóp.
Al Nursultan Nazarbaev «Nur Otandy» Toqaevqa tabystaı otyryp, saıası uıymnyń bolashaqty damý strategıasyn saılap ketti. Partıaǵa kelesideı mindet júkteldi:
- Ýaqyt kóshinen qalmaý.
- El pikirin elep-eskerý.
- Shynaıy ómirmen qabysatyn naqty maqsat qoıyp, oǵan jetý joldaryn aıqyndaý.
- Kózdegen maqsatyna bólinbeı, ary tart ta, beri tartqa salmaı, birlesip, birtutas komanda bolyp jetý.
- Qoǵamdy partıa qundylyqtarynyń tóńiregine toptastyrý, óz kezeginde osynaý qundylyqtar halyqtyń talap-tilegimen saı kelýi kerek.
«Nur Otannyń» negizgi 7 ustanymy:
- Adam.
- Erkindik.
- Zań ústemdigi
- Ádilettilik
- El pikirimen sanasý
- Bolashaqqa umtylý
- Otbasy jáne dástúr.
Nazarbev partıanyń negizgi ustanymdary retinde osy qaǵıdalardy nyqtap ketti. Budan bólek memlekettiń irgetasy sanalatyn negizgi 7 prınısten taımaýdy tapsyrdy.
Nazarbaevtyń sońyna qaldyrar murasy da osy. "Toqaev osy úshin kúresý tıis jáne ótken 30 jylda ózi qabyrǵasyn qalaǵan qundylyqtardy saqtap qalýǵa mindetti" dep sanaıdy. Tutastaı alǵanda, osynaý prınsıpter eshbir eldiń taqıasyna tar kelmeıtin, kerisinshe damýyna baǵdar bolarlyq qaǵıdalar.
