Bul joly áriptesimiz Jaina Slambekqyzy áleýmettik jelilerde sóz bolǵan dúnieler ainalyp ótken joq.
«Sizdiń aldyńǵy suhbatyńyz orys tilinde boldy. Baspasóz hatshyńyzdyń aitýynsha, ol suhbat halyqaralyq aýditoriiaǵa arnalǵan. Bul joly qai aýditoriiaǵa arnalady? Osyndai bóle-jarý qazaq tilin kemsitý bolyp eseptelmei me?» degen saýalyna Toqaev jaýap berdi.
– Bul eshqandai da kemsitýshilik nemese mensinbeýshilik emes. Osyǵan deiin kóptegen telearna menen birneshe ret suhbat berýdi suraǵan bolatyn. Men olardyń eshqaisysyna kelisken joqpyn.
Keiin tek «Habar» arnasyna ǵana suhbat beremin dep sheshtim. Sebebi el ishinde kóptegen jalǵan aqparat tarap jatty, solarǵa toqtaý salý kerek boldy.
Sol suhbat orys tilinde jasaldy. Óitkeni, Qazaqstandaǵy ahýal jóninde shynaiy aqparatty, eń aldymen, álem jurtshylyǵyna berý kerek edi. Sodan keiin sheteldik aqparat quraldary suhbatty keńinen taratyp, barynsha paidalandy. Ony ózińiz bilesiz.
Qalai desek te, orys tili – Birikken Ulttar Uiymynyń alty resmi tiliniń biri. Ony moiyndaýymyz kerek. Al, qazaq tilindegi suhbattyń óz aýditoriiasy bar. Jalpy, memlekettiń máselesin memlekettik tilde aitýymyz kerek. Tilimiz bizden basqa eshkimge keregi joq. Sondyqtan, eń aldymen, ózimiz ana tilimizge qurmet kórsetýimiz kerek dep oilaimyn, – dedi Prezident.
