Prezident Qasym-Jomart Toqaev tsifrlandyrý men jasandy intellekt tehnologiialaryn keńinen engizýge baǵyttalǵan jańa strategiiany bekitti, dep habarlaidy dalanews.kz.
Aqorda málimetinshe, Memleket basshysy "Aýqymdy tsifrlandyrýdyń jáne jasandy intellekt tehnologiialaryn jappai endirýdiń 2029 jylǵa deiingi Digital Qazaqstan jalpyulttyq strategiiasyn bekitý týraly" jarlyqqa qol qoiǵan.
Jarlyqtyń tolyq mátini baspasózde jariialanady.
Aita keteiik, biyl sáýir aiynda Prezident Alem.ai battle jáne AI Governance Cup baiqaýlarynyń jeńimpazdaryn marapattaý rásiminde tsifrlandyrý men jasandy intellektini damytý máselesine erekshe toqtalǵan bolatyn. Sol kezde Qasym-Jomart Toqaev bul baǵyt Qazaqstandy jan-jaqty jańǵyrtýdyń mańyzdy tetikteriniń biri ekenin aitqan.
Memleket basshysy elimizdiń tsifrlyq damý baǵytyn aiqyndaityn Digital Qazaqstan strategiiasy qabyldanatynyn da sol kezde málimdegen edi.
"Bárińizge belgili, biyl elimizde – "Tsifrlandyrý jáne jasandy intellekt jyly". Sondyqtan aldymyzda áli de kóp jumys bar. Shiraq qimyldap, tutas qoǵam bolyp tabandy eńbek etýimiz kerek", – dedi Prezident.
Qasym-Jomart Toqaev qazirgi álemniń óte joǵary qarqynmen ózgerip jatqanyn atap ótti. Onyń aitýynsha, mundai kezeńde Qazaqstan básekege qabiletti el retinde damyp, tehnologiialyq kóshten qalmaýy kerek.
Prezidenttiń pikirinshe, tsifrlandyrý men jasandy intellektini tiimdi engizý eldiń ósip-órkendeýine, memlekettik basqarý men ekonomikanyń jańarýyna yqpal etedi.
