Memleket basshysy Qasym-Jomart Toqaev salyq júiesine qatysty qandai ózgerister kerek ekenin aitty, - dep habarlaidy Dalanews.kz.
Prezidenttiń sózinshe, aldymyzda ulttyq ekonomikany sapaly ári qarqyndy damytý degen óte mańyzdy mindet tur.
"Tabys pen múlikke salyq salýdyń jańa júiesin engizbesek, kásipkerlerdi tabysyn qaltaǵa baspai, biznesin damytý úshin jumsaýǵa yntalandyrmasaq, arnaiy salyq rejimderin ózgertpesek, bul mindetti oryndai almaimyz. Sondyqtan Salyq kodeksi sekildi strategiialyq mańyzy bar qujatty ázirleýge osy sala mamandarynan bólek ekonomister men biznes ókilderi jumyldyrylýy qajet. Árine, biýdjet qorjynyn toltyrý mindetin umytýǵa bolmaidy. Ekonomika neǵurlym qýatty bolsa, soǵurlym kóp salyq túsedi degen qaǵidatty berik ustaný kerek.
Salyqty jaidan jai kóbeite salýǵa bolmaidy. Eń aldymen, salyq salý júiesin rettep, ony jetildirý qajet. Sondai-aq, kóleńkeli ekonomikany barynsha azaitý kerek. Iaǵni, salyq júiesin basqarý jumysy durys jolǵa qoiylmasa, eń ozyq degen salyq saiasatynyń ózi tiimsiz bolyp shyǵady.
Úkimet salyq jeńildikterin berýdiń ashyq ári naqty erejelerin ázirleýge tiis. Qarjy ministrliginiń málimeti boiynsha jeńildik berýdiń saldarynan jyl saiyn biýdjetke ortasha eseppen 7 trillionǵa jýyq teńge kem túsedi. Men salyq jeńildikterin 20 paiyzǵa azaitý týraly tapsyrma berdim. Biraq, áli kúnge deiin oryndalǵan joq, tipti, máseleni sheshý joldary da ázir emes", - dedi Memleket basshysy.
