Memleket basshysy Japoniianyń syrtqy ister ministrin qabyldady, dep habarlaidy Dalanews.kz.
Prezident Qasym-Jomart Toqaev pen ministr Takeshi Ivaia saýda-ekonomikalyq, investitsiialyq, kólik-tranzit jáne mádeni-gýmanitarlyq salalardaǵy qazaq-japon keńeitilgen strategiialyq seriktestiginiń qazirgi jai-kúii men damý perspektivasyn talqylady. Sondai-aq halyqaralyq qurylymdar aiasyndaǵy yqpaldastyq jóninde pikir almasty.
Qasym-Jomart Toqaev Japoniia syrtqy saiasat vedomstvosynyń basshysyna iltipat bildire otyryp, onyń Astanaǵa sapary eki el arasyndaǵy qarym-qatynasty arttyrýǵa tyń serpin beretinin atap ótti.
"Japoniia – Aziiadaǵy senimdi ári jaqyn seriktesimiz. Biz Tokiomen jan-jaqty yntymaqtastyqty nyǵaitýǵa erekshe mán beremiz. Premer-ministr Ishibaǵa ystyq yqylasymdy jetkizýdi suraimyn. Premer-ministr Shigerý Ishiba Qazaqstanǵa resmi saparmen kelmekshi. Biz onyń saparyn asyǵa kútip, daiyndalýdamyz. Ózara qarym-qatynasymyz joǵary qarqynmen damyp kele jatyr dep senimmen aitýǵa bolady", – dedi Prezident.
Óz kezeginde Takeshi Ivaia qonaqjailyq tanytqany úshin Qazaqstan Prezidentine rizashylyǵyn bildirdi.
"Sizdiń sálemińizdi Premer-ministrimizge mindetti túrde jetkizemiz. Qazaqstan men Japoniia – halyqaralyq tártipti kúsheitýge múddeli strategiialyq seriktester. Meniń bul saparym eki el arasyndaǵy bailanysty odan ári damytýǵa jol ashady dep oilaimyn", – dedi Japoniia Syrtqy ister ministri.
Sonymen qatar, Qasym-Jomart Toqaev pen Takeshi Ivaia halyqaralyq jáne óńirlik kún tártibindegi ózekti máseleler jóninde áńgimelesti.
