Memleket basshysy Japoniia Parlamentiniń Qazaqstanmen dostyq ligasy múshelerimen kezdesti, dep habarlaidy Dalanews.kz.
Prezident Qasym-Jomart Toqaev Toshiaki Endo bastaǵan Japoniia Parlamentiniń Qazaqstanmen dostyq ligasy múshelerimen kezdesý ótkizdi.
Memleket basshysy Dostyq ligasynyń qyzmetine joǵary baǵa berip, ony ekijaqty yntymaqtastyqty nyǵaitýdyń mańyzdy tetigi retinde qarastyratynyn atap ótti.
"Elimiz Tokiomen jan-jaqty yqpaldastyqty odan ári arttyrýǵa basa mán beredi. Parlamentaralyq dialog tereńdei tústi. Túrli deńgeidegi bailanystar turaqty túrde jalǵasýda. Saýda-ekonomika jáne investitsiia salasyndaǵy ekijaqty qatynastarymyz tyń serpinmen damyp keledi. Japoniia Qazaqstandaǵy iri investordyń qataryna kiredi. Byltyr taýar ainalymy 2 milliard dollarǵa jetti. Bul – Japoniianyń Ortalyq Aziia memleketterimen jalpy saýda kóleminiń 70 paiyzynan astamy degen sóz. Sondai-aq kólik-logistika, energetika, aýyl sharýashylyǵy jáne basqa da salalarda naqty jobalar bar. Biz búgin Imperator Narýhitomen kezdesýde meditsina salasy, sý máselesi boiynsha pikir almastyq. Shyn máninde ekijaqty yntymaqtastyqtyń keleshegi zor. Mádeni-gýmanitarlyq bailanysymyz tereńnen tamyr tartady. Eki el bilim jáne ǵylym, mádeniet pen óner, sport jáne týrizm salalarynda ózara tyǵyz yqpaldastyq ornatty. Biyl Osakada ótken Dúniejúzilik kórme aiasynda qazaqtyń uly aqyny, ǵulama oishyly Abai Qunanbaiulynyń týǵanyna 180 jyl tolýyn atap óttik", – dedi Qazaqstan Prezidenti.
Memleket basshysy jahandyq ózekti máselelerge qatysty Qazaqstan men Japoniianyń ustanymdary ortaq ekenine toqtaldy.
"Biz Birikken Ulttar Uiymy jáne basqa da halyqaralyq qurylymdar aiasynda beibitshilikti qamtamasyz etý, iadrolyq qarýsyzdaný máseleleri boiynsha bir-birimizdi únemi qoldap kelemiz. Qazaqstan aimaqaralyq yntymaqtastyǵymyzdyń mańyzdy tetigi sanalatyn «Ortalyq Aziia + Japoniia» sammitine airyqsha mán beredi. Premer-ministr Sanae Takaichi hanymmen ótetin kezdesýde birqatar máseleni talqylaimyz. Bul kelissózder saiasi dialogty tereńdetip, ekonomikalyq jáne gýmanitarlyq alys-beristi jandandyrýǵa jol ashady. Halyqtarymyz ósip-órkendep, ózara tiimdi qarym-qatynasymyz nyǵaia beredi dep senemin", – dedi Qasym-Jomart Toqaev.
