Memleket basshysy Mysyrda ótken janama kelissózder barysynda qol jetkizilgen Gaza sektoryndaǵy qaqtyǵysty toqtatý jáne tutqynǵa alynǵan adamdardy bosatý týraly kelisimdi qoldady, dep habarlaıdy Dalanews.kz.
Bul týraly Prezıdenttiń kómekshisi – Baspasóz hatshysy Rýslan Jeldibaı habarlady.
Memleket basshysy Mysyr, Qatar, Túrkıa elderiniń araaǵaıyndyq qyzmeti tabysty bolǵanyn, sondaı-aq Taıaý Shyǵysta beıbitshilik ornatý jónindegi kelissózderge Prezıdent Donald Tramp bastaǵan AQSH tarapynyń erekshe úles qosqanyn atap ótti.
Al AQSH prezıdenti Donald Tramptyń aıtýynsha, Izraıl men HAMAS Vashıngton usynǵan beıbit kelisimniń alǵashqy kezeńine qol qoıdy.
Tramptyń málimdeýinshe, bul qadam jaqyn kúnderi barlyq tutqyndardy bosatýǵa jáne Izraıl áskerin aldyn ala kelisilgen shepterge áketýge jol ashady.
«Bul - turaqty jáne senimdi beıbitshilikke baǵyttalǵan alǵashqy ári sheshýshi qadam. Barlyq taraptarmen ádil mámile jasalady», - dep jazdy AQSH prezıdenti.
Buǵan deıin Tramp Izraıldiń Gaza sektoryndaǵy áskerı áreketteri halyqaralyq qoldaýdyń álsireýine ákelgenin aıtyp, elge degen senimdi qaıta ornatýǵa ýáde bergen bolatyn. Sondaı-aq ol Izraıl premer-mınıstri Bınámın Netanáhýnyń «soǵys áreketterinde shekten shyqqanyn» atap ótip, qaqtyǵysty toqtatatyn ýaqyt jetkenin málimdedi.
