Memleket basshysy Qasym-Jomart Toqaev "Baiqońyr" ǵarysh ailaǵynyń 70 jyldyǵyna orai videoúndeý joldap, barsha qazaqstandyqty, sala mamandaryn jáne ardagerlerdi aitýly merekemen quttyqtady, dep habarlaidy Dalanews.kz.
"1957 jyly dál osy aradan jasandy Jer serigi ushyrylyp, ǵaryshty igerý dáýiri bastaldy. Kóp uzamai, 1961 jyly ailaqtan tuńǵysh ǵaryshker Iýrii Gagarin kók júzine attandy. Bul tarihi oqiǵa jahan jurtshylyǵyn biriktirip, adamzattyń ǵylym men órkeniet progresine degen senimin nyǵaitty. Sodan beri Baiqońyrdan myńdaǵan Jer serigi ushyrylyp, ondaǵan missiia oryndaldy. Munda kórnekti ǵalymdar, konstrýktorlar men injenerler jumys istedi. Uly jetistikterdiń bastaýynda turǵan barlyq mamanǵa sheksiz rizashylyǵymdy bildiremin", - dedi ol.
Prezident Baiqońyrdan myńdaǵan Jer serigi ushyrylyp, ondaǵan mańyzdy missiia júzege asqanyn, munda asa kórnekti ǵalymdar men injenerler eńbek etkenin atap ótti. Sonymen qatar, Toqaev Toqtar Áýbákirov, Talǵat Musabaev jáne Aidyn Aiymbetov siiaqty qazaq ǵaryshkerleriniń esimin erekshe atady.
"Elimiz halyqaralyq ǵaryshty igerý isiniń belsendi múshesi sanalady. "Baiqońyr" ailaǵy – Qazaqstan men Reseidiń dostyqqa, tatý kórshilikke jáne ózara túsinistikke negizdelgen uzaqmerzimdi strategiialyq seriktestiginiń jarqyn kórinisi.
Sońǵy onjyldyqtarda Qazaqstan ulttyq ekonomikanyń damýyna yqpal etetin birqatar aýqymdy ǵarysh jobalaryn iske asyrdy. Elimiz Baiqońyrdy halyqaralyq yntymaqtastyqtyń, ǵylym men bilimniń jáne týrizmniń ortalyǵyna ainaldyrýǵa umtylady. Ǵarysh qyzmetiniń jańa naryqtaryna shyǵý, jas injenerlerdiń, konstrýktorlar men ǵalymdardyń áleýetin arttyrý jarqyn bolashaqqa jol ashady", - dedi ol.
Memleket basshysy Baiqońyr qalasynyń turǵyndaryna da alǵys bildirip, olardyń bul saladaǵy tabandy eńbegin joǵary baǵalady. Prezident aldaǵy ýaqytta Baiqońyrdyń ozyq innovatsiialardyń ortalyǵy bolatynyna senim bildirdi.
"Osy oraily sátti paidalanyp, Baiqońyr qalasynyń turǵyndaryna airyqsha alǵys aitqym keledi. Sizder tabandy eńbek etip, ǵaryshty zertteý isiniń izasharlarynan qalǵan mol murany muqiiat saqtap kelesizder. Bul – zor qurmetke laiyq. Ǵarysh salasy búkil adamzatty árdaiym ortaq maqsatqa jumyldyryp, jańashyldyq pen ǵylymi-tehnikalyq progreske bastaidy. Baiqońyr aldaǵy ýaqytta da uly jańalyqtar men ozyq innovatsiialardyń qainar kózi bola beredi dep senemin!", - dedi Prezident.
