Memleket basshysy Qasym-Jomart Toqaevtyń jarlyǵymen Bas prokýratýra men Bas prokýrordyń birqatar ókilettigi keńeitildi. Qujat 2026 jylǵy 21 tamyzdan bastap kúshine endi, dep habarlaidy dalanews.kz.
Jańartylǵan ókilettikterge sáikes, Bas prokýratýra zańdardyń qoldanylýyn qadaǵalaý jáne zańdylyqtyń jai-kúiine qatysty praktikany taldai alady. Bul rette quqyq qorǵaý, arnaýly memlekettik jáne ózge de organdardyń aqparat almasý júiesine biriktirilgen aqparattyq júielerindegi, sondai-aq Ulttyq tsifrlyq investitsiialyq platformadaǵy málimetter paidalanylýy múmkin.
Bas prokýratýraǵa qylmystyq-quqyqtyq salada, investorlardyń quqyqtaryn qorǵaý jáne aktivterdi qaitarý máseleleri boiynsha halyqaralyq sharttar jasasý jáne olardyń jobalaryn kelisý ókilettigi de berildi.
Sonymen qatar vedomstvo aktivterdiń satyp alyný nemese paida bolý kózderiniń zańdylyǵyn tekserip, olardy zańsyz iemdenýge, elden shyǵarýǵa qarsy is-qimyl boiynsha aqparatty monitoringtep, taldai alady. Bul jumys zańsyz iemdenilgen aktivterdi memleketke qaitarý týraly zańnama aiasynda júrgiziledi.
Bas prokýratýra óz mindetterin oryndaý úshin memlekettik organdar men uiymdardyń mamandaryn, ǵalymdar men sarapshylardy, sondai-aq kommertsiialyq jáne kommertsiialyq emes uiymdardy, onyń ishinde sheteldik uiymdardy tarta alady.
Jańa ókilettikterdiń biri menshik nysanyna qaramastan uiymdardyń aktilerine narazylyq bildirý múmkindigine qatysty. Eger mundai aktiler Konstitýtsiiaǵa, zańdarǵa, ratifikatsiialanǵan halyqaralyq sharttarǵa nemese Prezident aktilerine qaishy kelse jáne belgili bir sanattaǵy adamdardyń quqyqtaryna áser etse, prokýratýra olardy narazylyq tártibimen qaraýǵa múmkindik alady.
Bul norma fiziologiialyq erekshelikterine, psihikalyq aýytqýlaryna nemese basqa da jaǵdailarǵa bailanysty óz quqyqtaryn óz betinshe qorǵai almaityn adamdarǵa, kámeletke tolmaǵandarǵa, adamdardyń belgisiz tobyna, sondai-aq zańda belgilengen shekterde investorlarǵa qatysty qoldanylady.
Budan bólek, Bas prokýratýra aktivterdi qaitarý jáne investorlardyń quqyqtaryn qorǵaý máseleleri boiynsha halyqaralyq quqyqtyq yntymaqtastyqty úilestiredi.
Jarlyqpen Bas prokýrordyń da ókilettikteri keńeitildi. Endi Bas prokýror investitsiialyq ombýdsmenniń fýnktsiialaryn júzege asyrady jáne investorlardyń quqyqtaryn qorǵaý salasynda normativtik aktiler qabyldai alady.
Sondai-aq Bas prokýror investorlar men memlekettik organdar, jergilikti atqarýshy organdar, mekemeler jáne kvazimemlekettik sektor sýbektileri arasyndaǵy daýlardy sotqa deiin retteý jónindegi komissiiany qurý tártibin bekitedi.
Bas prokýrordyń ókilettigine investorlardyń júieli problemalarynyń tizilimin qalyptastyrý jáne júrgizý tártibin bekitý de engizildi.
Qujatta Bas prokýratýra men Bas prokýrordyń Konstitýtsiialyq zańda, Qazaqstan zańdarynda jáne Prezident aktilerinde kózdelgen ózge de quqyqtary men mindetterin júzege asyrýy qarastyrylǵan.
