Memleket basshysy Qasym-Jomart Toqaev respýblikalyq Tamyz konferentsiiasynyń plenarlyq otyrysynda sóz sóiledi, dep habarlaidy dalanews.kz.
Toqaevtyń sózinshe, aimaqtar arasyndaǵy bilim sapasyna qatysty alshaqtyqty joiý qajet.
"Osy tusta Ulttyq biryńǵai testileýdiń biylǵy nátijelerine toqtalǵym keledi. Máselen, Qyzylorda, Soltústik Qazaqstan, Pavlodar, Qostanai oblystarynyń, sondai-aq, Astana jáne Almaty qalalarynyń túlekteri joǵary kórsetkishke qol jetkizdi. Al Túrkistan, Ulytaý, Atyraý, Aqtóbe jáne Almaty oblystaryndaǵy jaǵdai jaqsy dep aitý qiyn. Ásirese, tiisti ministrlik pen ákimdik Túrkistan oblysyndaǵy ahýalǵa nazar aýdarýy kerek. PISA uiymynyń zertteýi de Túrkistan oblysyndaǵy bilim sapasy máz emes ekenin kórsetti. Bul – aimaqtyń oqý-aǵartý júiesinde olqylyqtar áli bar degen sóz. Biraq oblystaǵy jaǵdaidy daǵdarys dep te aitýǵa bolmaidy", - dedi Prezident.
Memleket basshysynyń aitýynsha, oblysta bilim alyp jatqan oqýshylardyń 75 paiyzǵa jýyǵy aýylda turady.
"Olardyń jan-jaqty jáne qarqyndy damýy úshin qolaily jaǵdai jasalýǵa tiis. Qajet infraqurylym salyp, shalǵai eldi mekenderge myqty mamandardy tartqan jón. Bul – Úkimettiń jáne ákimdikterdiń aldynda turǵan jedel mindet, jumysty josparly túrde tezdetip atqaryp, naqty nátijelerge qol jetkizý qajet. Jalpy tómen nátije kórsetken barlyq aimaqtyń ákimderi bul baǵyttaǵy jumysty kúsheitýi kerek. Úkimetke osy jumysty tiimdi úilestirýdi tapsyramyn", - dedi Prezident.
