Memleket basshysy Qasym-Jomart Toqaev 2025 jyly 10 qańtarda "Qazaqstan Respýblikasynyń keibir zańnamalyq aktilerine Memlekettik bilim berý jinaqtaý júiesi, aqparat, qoǵamdyq damý, mádeniet jáne arhiv isi salalarynda artyq zańnamalyq reglamentteýdi bolǵyzbaý máseleleri boiynsha ózgerister men tolyqtyrýlar engizý týraly" Zańǵa qol qoidy, dep jazady Dalanews.kz.
Túzetýlerdiń birinshi blogy memleketten bastapqy bilim berý kapitaly, jyl saiyn tólenetin memlekettik syilyqaqy jáne investitsiialyq tabys qarastyrylǵan, sondai-aq bes jastan asqan balalardy qamtityn "Keleshek" biryńǵai erikti jinaqtaý júiesin engizý maqsatynda ázirlengen.
"Birjolǵy bastapqy bilim berý kapitaly 2025 jyly jáne odan keiingi jyldary 5 jasqa tolatyn balalarǵa tólenedi. Onyń mólsheri Ǵylym jáne joǵary bilim ministrligi bekitetin bastapqy bilim berý kapitalyn esepteý, paidalaný jáne qaitarý qaǵidalaryna sai esepteledi. "Keleshek" júiesi jyl saiyn 5% memlekettik syilyqaqy, al halyqtyń áleýmettik osal toptarynyń balalary úshin 7% memlekettik syilyqaqy kózdelgen qoldanystaǵy Memlekettik bilim berý jinaqtaý júiesimen birge balańyzdyń bolashaǵy úshin qarajat jinaýǵa múmkindik beredi. Iaǵni qarjyny tehnikalyq jáne kásiptik bilim alýǵa, orta mektep bitirgennen keiin joǵary bilim alýǵa jáne joǵary oqý ornynan keiin bilimin jetildirýge, sondai-aq turǵyn úi jaǵdaiyn jaqsartýǵa jumsaýǵa bolady", delingen Aqorda habarlamasynda.
Aita ketsek, atalǵan júie sheńberinde balaǵa arnaiy shot ashýǵa bolady, oǵan memleket 60 AEK mólsherinde (5 jastaǵy balalarǵa) bilim alýǵa bastapqy kapital salady. Budan ári oǵan ata-analardyń erikti jarnalary, 5-7% mólsherinde jyl saiynǵy memlekettik syiaqy jáne investitsiialyq tabys esebinen qarajat jinaqtalady. Osylaisha, aiyna 1 AEK (3 932 teńge) mólsherindegi eń tómengi jarna salynyp otyrsa, bala 18 jasqa tolǵanda shotynda 3,3 mln teńgeden astam qarajat jinalmaq. Tiisinshe, ata-analardyń erikti jarnalary, mysaly, aiyna 3 AEK-ke deiin kóbeise, 7 mln teńgeden astam qarajat jinaqtaý múmkindigi bolady.
Sonymen qatar halyqtyń áleýmettik osal toptaryn qoldaýdyń qosymsha sharalary kózdeledi, ásirese ózgerister jetim balalar men ata-anasynyń qamqorlyǵynsyz qalǵan balalarǵa qatysty bolady. Sondai-aq aqshanyń qunsyzdanýynan qorǵaý quraldary qarastyrylǵan.
