Memleket basshysy Premer-ministrdiń orynbasary – Mádeniet jáne aqparat ministri Aida Balaevany qabyldady, dep habarlaidy dalanews.kz.
Prezident Qasym-Jomart Toqaevqa mádeniet, aqparat jáne áleýmettik saiasat salalarynda jańa Konstitýtsiia erejelerin júzege asyrý barysy, sondai-aq azamattardyń turmys sapasyn kóterýdi kózdeitin memlekettik saiasattyń negizgi baǵyttary baiandaldy.
Vitse-premer zańnamany jańa Ata zańǵa sáikestendirý, memlekettik aqparattyq saiasatty jetildirý, tsifrlyq keńistikti ilgeriletý, azamattyq qoǵam institýttarymen ózara is-qimyldy nyǵaitý, sondai-aq otbasy jáne jastar saiasaty, volonterlik qyzmet pen qoǵamdyq baqylaý salalarynda atqarylyp jatqan jumystar týraly málimet berdi.
Memleket basshysyna jańa bilim, ǵylymi-aǵartýshylyq jáne shyǵarmashylyq nysandaryn qurý, dástúrli ónerdi qoldaý men bilikti maman daiarlaý baǵyttarynda elimizdiń mádeni infraqurylymyn jandandyrý jónindegi usynystar aityldy.
Memlekettik áleýmettik saiasatty iske asyrý máselelerine airyqsha nazar aýdaryldy. Aida Balaeva bilim, ǵylym, densaýlyq saqtaý, áleýmettik qorǵaý, jumyspen qamtý, sport jáne týrizm salalaryn órkendetý jaiynda áńgimeledi. Vedomstvoaralyq yqpaldastyqty kúsheitýge, memlekettik qyzmetterdiń sapasy men qoljetimdiligin arttyrýǵa, adami kapitaldy damytýǵa, zamanaýi tsifrlyq sheshimderdi engizýge jáne áleýmettik sala infraqurylymyn qalyptastyrýǵa erekshe mán berildi.
Kezdesý sońynda Prezident mádeniet, aqparat jáne áleýmettik damý salalaryndaǵy memlekettik saiasatty odan ári kúsheitýge baǵyttalǵan birqatar tapsyrma júktedi.
