Memleket basshysy Astana qalasynyń ákimi Jeńis Qasymbekti qabyldady, dep habarlaidy Dalanews.kz.
Qasym-Jomart Toqaevqa elordanyń áleýmettik-ekonomikalyq jáne infraqurylymdyq damýy jaiynda esep berildi.
Prezidentke barlyq basty ekonomikalyq kórsetkishter boiynsha oń dinamika saqtalyp otyrǵany baiandaldy. Negizgi kapitalǵa salynǵan investitsiia kólemi 7 aida 1,2 trillion teńgeni qurady. Bul – ótken jyldyń osy kezeńimen salystyrǵanda 42,1 paiyzǵa joǵary. Biyl jalpy quny 300 milliard teńge bolatyn 55 investitsiialyq jobany iske asyrý josparlanyp otyr. Bul bastamalar 3,6 myń jańa jumys ornyn ashýǵa múmkindik beredi .
Astana ákimi áleýmettik nysandardyń qurylysy, apatty jaǵdaidaǵy eski úilerdi buzý, turǵyn úi alaptaryn damytý, qalany abattandyrý jáne kógaldandyrý jumystary týraly aitty. Memleket basshysynyń tapsyrmasyna sai, «Keleshek mektepteri» ulttyq jobasy aiasynda elordada 1 qyrkúiekte 28 myń oqýshyǵa arnalǵan 7 jańa mektep ashyldy. Osy oqý jylynda qalada 15 jańa mektep paidalanýǵa berilmek. Byltyrǵy kezeńde 66 myń oqýshyǵa arnalǵan 24 mektep, sonyń ishinde 16 «Keleshek mektebi» ashyldy. Jyl sońyna deiin 4716 stýdentke arnalǵan 8 jataqhana boi kóteredi. Biyl Astanada 170 aýla men qoǵamdyq keńistikti abattandyryp, 1 millionnan asa jasyl jelek egý josparlanyp otyr.
Qasym-Jomart Toqaevqa jylytý maýsymyna daiyndyq jaiynda málimet berildi. Úshinshi jylý elektr ortalyǵynyń birinshi kezegin, sondai-aq «Turan» jáne «Ońtústik-Shyǵys» gaz stansalaryn paidalanýǵa berý arqyly shahardyń jylytý qýaty 30 paiyzǵa ulǵaiǵan. Iaǵni qosymsha 1100Gkal/saǵat qýat óndire bastady. Biyl «Turan» stansasynyń ekinshi kezegin aiaqtaý josparlanǵan. «Telman» stansasynyń qurylysy júrip jatyr. Ekinshi jylý elektr ortalyǵyn keńeitý jáne «Ońtústik-Batys» gaz jylý stansasyn jobalaý kózdelip otyr.
Kezdesý sońynda Memleket basshysy turǵyn úi-kommýnaldyq sharýashylyǵy jáne áleýmettik sala nysandaryn aldaǵy jylytý maýsymyna daiyndaý, jańbyr sýyna arnalǵan káriz júiesin retteý, jol-kólik infraqurylymy men abattandyrý máselelerin sheshý jóninde birqatar tapsyrma berdi.
