Toqaev Almatyda jetim balalardy Qonaevqa kúshtep kóshirýdi toqtatýdy tapsyrdy

Kórkem Aldabergenova 21 shil. 2025 11:29

Prezıdent Qasym-Jomart Toqaev Almatydaǵy balalar úıi tárbıelenýshilerin kóshirý týraly sheshimdi toqtatýdy tapsyrdy, dep habarlaıdy Dalanews.kz.

Bul týraly prezıdenttiń baspasóz hatshysy Rýslan Jeldibaı habarlady.

«Baǵanashyl» balalar úıiniń tárbıelenýshilerin Almatydan Qonaev qalasyna kóshirýge baılanysty jaǵdaımen tanysqan Qasym-Jomart Toqaev Almaty qalasynyń ákimi Darhan Satybaldyǵa oqýshylardyń ońtústik astanada bilim alýyn jalǵastyrý úshin balalar úıine jóndeý jumystaryn júrgizýdi jáne atalǵan nysandy qalanyń balansyna alýdy tapsyrdy.

- Memleket basshysynyń tapsyrmasyna sáıkes, balalar úıi kóshirilmeıdi. Atalǵan jaǵdaıǵa baılanysty Prezıdent Ákimshiligi qyzmettik tekseris júrgizedi. Ata-anasynyń qamqorlyǵynsyz qalǵan balalardyń zań sheńberindegi barlyq quqyǵy tolyq saqtalady,- deıdi Rýslan Jeldibaı.

Eske sala ketsek, buǵan deıin №1 oblystyq balalar úıiniń tárbıelenýshileri mekemeniń Almatydan Qonaevqa kóshirilip jatqanyna shaǵymdanǵan bolatyn. Qoǵam belsendileri Almatynyń elıtaly aýdany – Baǵanashyldaǵy qundy jer telimi belgisiz qurylys kompanıalarynyń kózine túsip, olar bul aýmaqqa turǵyn úı keshenin salǵysy keletinin málimdegen edi.

Keıinirek Almaty oblysynyń ákimi Marat Sultanǵazıev №1 oblystyq balalar úıiniń tárbıelenýshileri Almatydan tys jerge kóshirilmeıtinin aıtty. Ákimdik ókilderi «qazirgi ýaqytta qalada oqyp jatqan tárbıelenýshiler oqýyn burynǵydaı jalǵastyra beredi, al jańadan qabyldanǵan balalar Qonaev qalasyna ornalastyrylady» dep málimdedi. Aımaq basshysy sol kezde «Balalar Almatyda qalǵysy keletinin bildirdi, óıtkeni orta aýystyrý olardyń beıimdelýi men áleýmettenýine keri áser etýi múmkin. Bul faktor sheshim qabyldaýda mańyzdy ról atqardy» dep túsindirdi.

Al búgin balalardy Qonaevqa kúshtep kóshirip jatqany belgili boldy.