توقايەۆ الماتىدا جەتىم بالالاردى قونايەۆقا كۇشتەپ كوشىرۋدى توقتاتۋدى تاپسىردى

كوركەم الدابەرگەنوۆا 21 ءشىل. 2025 11:29

پرەزيدەنت قاسىم-جومارت توقايەۆ الماتىداعى بالالار ءۇيى تاربيەلەنۋشىلەرىن كوشىرۋ تۋرالى شەشىمدى توقتاتۋدى تاپسىردى، دەپ حابارلايدى Dalanews.kz.

بۇل تۋرالى پرەزيدەنتتىڭ باسپا ءسوز حاتشىسى رۋسلان جەلدىباي حابارلادى.

«باعاناشىل» بالالار ءۇيىنىڭ تاربيەلەنۋشىلەرىن الماتىدان قونايەۆ قالاسىنا كوشىرۋگە بايلانىستى جاعدايمەن تانىسقان قاسىم-جومارت توقايەۆ الماتى قالاسىنىڭ اكىمى دارحان ساتىبالدىعا وقۋشىلاردىڭ وڭتۇستىك استانادا ءبىلىم الۋىن جالعاستىرۋ ءۇشىن بالالار ۇيىنە جوندەۋ جۇمىستارىن جۇرگىزۋدى جانە اتالعان نىساندى قالانىڭ بالانسىنا الۋدى تاپسىردى.

- مەملەكەت باسشىسىنىڭ تاپسىرماسىنا سايكەس، بالالار ءۇيى كوشىرىلمەيدى. اتالعان جاعدايعا بايلانىستى پرەزيدەنت اكىمشىلىگى قىزمەتتىك تەكسەرىس جۇرگىزەدى. اتا-اناسىنىڭ قامقورلىعىنسىز قالعان بالالاردىڭ زاڭ شەڭبەرىندەگى بارلىق قۇقىعى تولىق ساقتالادى،- دەيدى رۋسلان جەلدىباي.

ەسكە سالا كەتسەك، بۇعان دەيىن №1 وبلىستىق بالالار ءۇيىنىڭ تاربيەلەنۋشىلەرى مەكەمەنىڭ الماتىدان قونايەۆقا كوشىرىلىپ جاتقانىنا شاعىمدانعان بولاتىن. قوعام بەلسەندىلەرى الماتىنىڭ ەليتالى اۋدانى – باعاناشىلداعى قۇندى جەر تەلىمى بەلگىسىز قۇرىلىس كومپانيالارىنىڭ كوزىنە ءتۇسىپ، ولار بۇل اۋماققا تۇرعىن ءۇي كەشەنىن سالعىسى كەلەتىنىن مالىمدەگەن ەدى.

كەيىنىرەك الماتى وبلىسىنىڭ اكىمى مارات سۇلتانعازييەۆ №1 وبلىستىق بالالار ءۇيىنىڭ تاربيەلەنۋشىلەرى الماتىدان تىس جەرگە كوشىرىلمەيتىنىن ايتتى. اكىمدىك وكىلدەرى «قازىرگى ۋاقىتتا قالادا وقىپ جاتقان تاربيەلەنۋشىلەر وقۋىن بۇرىنعىداي جالعاستىرا بەرەدى، ال جاڭادان قابىلدانعان بالالار قونايەۆ قالاسىنا ورنالاستىرىلادى» دەپ مالىمدەدى. ايماق باسشىسى سول كەزدە «بالالار الماتىدا قالعىسى كەلەتىنىن ءبىلدىردى، ويتكەنى ورتا اۋىستىرۋ ولاردىڭ بەيىمدەلۋى مەن الەۋمەتتەنۋىنە كەرى اسەر ەتۋى مۇمكىن. بۇل فاكتور شەشىم قابىلداۋدا ماڭىزدى ءرول اتقاردى» دەپ ءتۇسىندىردى.

ال بۇگىن بالالاردى قونايەۆقا كۇشتەپ كوشىرىپ جاتقانى بەلگىلى بولدى.