Qurmetti Qazaq eli!
Ózderińizge málim, Qańtar oqıǵalaryna baılanysty qurylǵan «Amanat» komısıasy kúni búginge deıin jazyqsyz qamalǵan azamattardy bosatýmen aınalysyp keldi. Osy segiz aıdyń ishinde uzyn sany 500-den asa azamat bizdiń komısıamyzdyń tikeleı aralasýymen bostandyqqa shyqty.
Biraq, komısıa tek jazyqsyz azamattardy shyǵarýdy ǵana óz aldyna maqsat etip qoımady.
Osy ýaqyt ishinde júzdegen qamalǵandarmen tildesip, taǵdyrlaryna úńilip, bolǵan jaǵdaıdy ábden saralap, zerttep, qańtar oqıǵalaryna qatysýshylarǵa tutas raqymshylyq jasaý jónindegi usynysymyzdy Prezıdent atyna joldaǵan bolatynbyz.
Bizdi qoldap, senim artyp, uldarynyń taǵdyryn amanat etken halyqtyń úmitin aqtaý biz úshin eń basty mindet boldy!
Búgin, kórip otyrǵanyńyzdaı, osy bir usynysymyz eń joǵarǵy deńgeıde qoldaý taýyp, qańtar oqıǵalaryna qatysyp, qapasqa qamalǵan azamattarymyzǵa qatysty bir rettik raqymshylyq jasaý jaıynda tıisti sheshim qabyldanǵany Prezıdent aýzymen Parlament qabyrǵasynda qalyń elge jarıalandy. Myńdaǵan janǵa qýanysh syılaǵan bul súıinshi habardy biz ádilettiń saltanat qurýy, gýmanızm aktisi dep qabyldaımyz!
Bul – «Amanat» komısıasy jumysynyń sheshýshi qorytyndysy, biraq,jumysymyz bunymen aıaqtalmaıdy, aldaǵy ýaqytta komısıamyz raqymshylyq týraly zańnyń jasaqtalýyna, qoldanylýyna qatysty zań oryndarymen birlese jumystanatyn bolady.
Biz óz atymyzdan jáne qańtar oqıǵalaryna qatysty qamaýda bolǵan azamattar men olardyń týma-týystarynyń atynan Memleket bolashaǵyn eskerip, adamdar taǵdyryna qatysty osyndaı ádil sheshim qabyldaǵany úshin Prezıdent Qasym-Jomart Toqaevqa úlken alǵys aıtamyz!
Abzal Quspan
Madı Jomartuly Myrzaǵaraev
Ýaıs Ersaıynuly
